Հնագետների միջազգային արշավախումբն Իսրայելի տարածքում գտնվող քանանական Թել Քաբրի քաղաքի պեղումների ժամանակ հայտնաբերել է Մերձավոր Արևելքում ամենամեծ և հին գինու մառանը: Այս մասին հաղորդում է Ria Novosti-ն:
Հետազոտողների կարծիքով` այդ գինին տեղի վերնախավն օգտագործել է հանդիսավոր արարողությունների ժամանակ:
Հնագետները գտել են գինու 40 տարա` յուրաքանչյուրը 50 լիտր տարողությամբ: Նրանց գնահատականներով` այդ առարկաները 3.7 հազար տարեկան են:
Տարաներում պահպանված օրգանական նյութերի անալիզները ցույց են տվել, որ Թել Քաբրիի գինեգործներն իրենց ըմպելիքին հավելել են մեղր, անանուխ, դարչին և նույնիսկ խեժ: Հայտնի է, որ նման բաղադրություն են ունեցել Եգիպտոսում բուժման նպատակով գործածվող գինիները:
Պարզվել է նաև, որ բոլոր տարաներում գտնվել է միևնույն տեսակի գինի:
Հնագետները հույս ունեն շարունակել մառանի պեղումները 2015-ին:
