Հայաստանի արտակարգ իրավիճակների նախարարությունը աշխատանքներ է կատարում աղետների ազդարարման հետ կապված: Այսօր Ազգային ժողովում ԱԻ նախարար Արմեն Երիցյանը նշեց, որ աշխատում են ճապոնացի գործընկերների հետ՝ sms-հաղորդագրությունների միջոցով բնակչությանը աղետների մասին տեղեկացնելու համար:
«Համապատասխան մալուխներ ենք տանում բոլոր մարզեր, բոլոր շրջկենտրոնները մենք ապահովել ենք, դա ևս մի քիչ գումարի հետ է կապված, պիտի կարողանանք բոլոր համայնքներում ունենալ համապատասխան ռադիո և գծային ծառայություններ»,- ասաց նա:
Երիցյանը նաև անդրադարձավ ԱԻ նախարարության համակարգում հաշմանդամների ընդգրկվածության հարցին՝ նշելով, որ իրենք այդ մասին մշտապես չեն հայտարարում: «Ոչ թե մենք պիտի խփենք մեր դոշին, ասենք՝ մենք հաշմանդամ ենք ընդունել աշխատանքի… Դա մեր պարտականությունն է, արդեն 26 հաշմանդամի հրամանը տվել եմ: Մեզ մոտ աշխատում են սայլակավոր հաշմանդամներ, շատերը մեզ մեղադրում են, ասում են՝ ինչի՞: Գիտեք, եթե մարդ կույր է, կարող է այլ նախարարություններում էլ աշխատել, բայց այստեղ լուրջ խնդիրներ կան. մենք այդ ամենը լուծել ենք, շենքային պայմանները, հարկերը համապատասխանեցվել են հաշմանդամներին»,- ասաց նա:
Առաջիկայում ճգնաժամային կառավարման կենտրոններ են լինելու նաև մարզերում, այնտեղ էլ են աշխատելու հաշմանդամները:
Նախարարը նաև կարևորեց Հայաստանում փրկարարի կերպարի ստեղծումը՝ նշելով, որ ԱՄՆ-ում, եվրոպական երկրներում փրկարարներն ամենահարգված մարդիկ են, ինչին պետք է հասնենք նաև մենք: Երիցյանը հայտնեց, որ ինքն էլ իր հերթին է ամեն ինչ անում՝ փրկարարի պատիվը բարձր պահելու համար:
«Շատ հաճախ ինձ մեղադրում են, թե՝ գնում եմ մարզեր, իբր ինձ ցույց տալու համար մարդկանց եմ փրկում: Սակայն դա ես անում եմ ոչ թե ինձ ցուցադրելու համար, այլ կատարում եմ իմ աշխատանքը՝ որպես Հայաստանի Հանրապետության առաջին փրկարար»,- նշեց Երիցյանը:
Նա հիշեց՝ երբ Կիևյան կամրջից նետվել պատրաստվող երիտասարդին փրկեց, խոսակցություններ սկսվեցին՝ իբրև ինքն էր տարել կանգնեցրել նրան, հետո էլ՝ փրկել: Երիցյանը կեսկատակ-կեսլուրջ նկատեց՝ մեր երկրում ամենաանպաշտպանը նախարարներն են:
