Ռազմադաշտային հրամանատարների խորհրդի կազմակերպած կլոր սեղանի մասնակից քաղաքական բոլոր ուժերը համակարծիք են, որ երկրում առկա է խոր համակարգային ճգնաժամ, և որ դրանից դուրս գալու համար անհրաժեշտ են արմատական, խորքային փոփոխություններ: Այսօր տեղի ունեցած մամուլի ասուլիսի ժամանակ ասաց խորհրդի անդամ Սուրեն Սարգսյանը:
Նրա խոսքով, քննարկումների իրենց կոչին դրական են արձագանքել հայաստանյան գրեթե բոլոր կուսակցությունները, այդ թվում` իշխող ՀՀԿ-ն, որը, սակայն, հետագայում չի մասնակցել Ռազմադաշտային հրամանատարների խորհրդի կազմակերպած կլոր սեղանին:
«Հանրապետական կուսակցության պատգամավոր Կարինե Աճեմյանի շուրթերից օրերս հնչեց այն միտքը, որ իշխող կուսակցությունը, նրա կողմից ձևավորված կառավարությունը, ազատամարտիկների ցանկության դեպքում, կարող են հանդիպել նրանց: Սակայն հանդիպում այդպես էլ չեղավ: Մենք քառաջարկում ենք ՀՀԿ-ին՝ լուրջ մոտենալ հնարավոր երկխոսությանը, հարգել խորհրդի որդեգրած սկզբունքները, սթափ գնահատել իրավիճակը և չզբաղվել իմիտացիայով ու պոպուլիզմնով: Սերժ Սարգսյանը պետք է ուրախ լինի հանդիպել մեզ նման տղերքի հետ, ովքեր չխնայելով կյանքը` գնացին հայրենիքը պաշտպանելու: Թող խելքները հավաքեն գլուխները, թե չէ ցույց կտանք` որտեղ են խեցգետինները ձմեռում: Մեր երկիրը պետք է ոտքի կանգնի, բայց եթե կարիքը լինի, ներկայիս իշխանություններին կուղարկենք սեղանների տակ, որտեղից մենք ենք նրանց հանել»,- նշեց Սուրեն Սարգսյանը:
Նա նաև տեղեկացրեց, որ դեկտեմբերի 10-ին համակիր քաղաքական ուժերի հետ իշխանությունների առջև «ուժի ցուցադրություն» են կազմակերպելու: «Իշխանությունը պետք է տեսնի` ինչ միասնական ուժ ունենք մենք: Շուտով կունենանք այն մեխանիզմները, որոնցով պետք է ղեկավարենք այս երկիրը` այս ապիկար իշխանությունների գնալուց հետո: Բայց ամեն ինչից առաջ իշխանափոխություն է պետք և նոր միայն ազատ ընտրություններ: Ընդ որում՝ մենք նպատակ չունենք զուտ իշխանության գալու, մենք ուզում ենք բարեկեցիկ դարձնել մեր երեխաների ապագան: Բառիս ուղիղ իմաստով, երկրի տերը պետք է ժողովուրդը լինի»,- նկատեց Ռազմադաշտային հրամանատարների խորհրդի անդամը:
Ամփոփելով` Սուրեն Սարգսյանը հայտարարեց, որ Ղարաբաղը կա, լինելու է: «Արցախը մեր պատմական հողն է: Ոչ ոք չի կարող ոտնձգություն կատարել նրա հանդեպ: Արցախը, որպես հայկական բնօրրան, մնալու է և հարատևելու»,- նշեց նա:
Հիշեցնենք, որ համակարգային փոփոխությունների, երկրում առկա խնդիրների վերհանման և դրանց լուծման ճանապարհներ գտնելու համար Հայաստանի ռազմադաշտային հրամանատարների խորհուրդը նախաձեռնել է հանդիպումներ Հայաստանում գործող կուսակցությունների հետ: հանդիպումներ են տեղի ունեցել ԲՀԿ ղեկավար Գագիկ Ծառուկյանի, ՀԺԿ ղեկավար Ստեփան Դեմիրճյանի և «Ժառանգություն» կուսակցության առաջնորդ Րաֆֆի Հովհաննիսյանի հետ:
