Ռուսաստանը մտադիր է Հայաստանի և Ղազախստանի հետ առաջիկայում ստեղծել հակաօդային պաշտպանության միասնական համակարգ: Այս մասին հայտարարել է ՌԴ նախագահ Վլադիմիր Պուտինը՝ երկրում գործող մի շարք ուժային կառույցների բարձրագույն հրամանատարական պաշտոններում նշանակված զինվորականների հետ հանդիպման ժամանակ: Խոսակցություններ կան, որ Պուտինի՝ ՀՀ կատարելիք այցի օրակարգում մի շարք այլ հարցերի թվում այս հարցը լինելու է գլխավոր թեմաներից մեկը:
«Առաջին լրատվական»-ի հետ զրույցում ռուսաստանցի ռազմաքաղաքական վերլուծաբան, «Ամենօրյա հանդես» պարբերականի հոդվածագիր Ալեքսանդր Գոլցն այս մասին ասաց՝ սա ենթադրում է, որ ՀՀ հակաօդային պաշտպանության հրամանատարությունը կանցնի ՌԴ-ին, քանի որ ՀՕՊ-ի հրամանատարական կետը լինելու է ՌԴ-ում:
Նա պարզաբանեց, որ միասնական ՀՕՊ համակարգը ենթադրում է ՀՀ ՀՕՊ համակարգի միացում ՌԴ ՀՕՊ-ին: Ըստ նրա՝ սա առաջին հերթին ենթադրում է մշտական կապ ՀՕՊ համակարգերի միջև:
«ՀՀ հակաօդային պաշտպանության տարածքում կատարվող ցանկացած երևույթ միանգամից հասնելու է ՌԴ-ում գործող հրամանատարական կետ: Այսինքն՝ Հայաստանի հակաօդային պաշտպանությունը կմտնի ՌԴ-ի հրամանատարության տակ»,- նման տեսակետ հայտնեց Ալեքսանդր Գոլցը՝ հավելելով, որ դա ՀՀ-ի համար նշանակում է անվտանգության հավելյալ երաշխիքներ հակաօդային պաշտպանության ոլորտում:
Ինչ վերաբերում է ՀՕՊ-ի տեխնիկական հնարավորություններին, ապա ռուսաստանցի ռազմական փորձագետը գտնում է, որ ՌԴ-ը կվերազինի ՀՀ ՀՕՊ համակարգը, եթե ապագայում դրա անհրաժեշտությունը զգացվի, այսինքն՝ միացումը նաև դա է նշանակում՝ ՌԴ-ն կապահովի նաև անհրաժեշտ բազայով:
Անդրադառնալով ՌԴ-ՀՀ-Ղազախստան միասնական ՀՕՊ-ի հնարավոր թիրախներին՝ նա ասաց, որ սա պաշտպանական համակարգ է, ուստի քիչ հավանական է, որ այն որևէ երկրի դեմ օգտագործվի:
«Հայաստանի դեպքում սա ՀՀ-ին կտրամադրի հավելյալ անվտանգության երաշխիքներ և կամրացնի ՀՀ դիրքերը: Ռուսաստանցի ռազմական փորձագետը բացառում է, որ սա կարող է որևէ երկրի դեմ օգտագործվել և տարածաշրջանում ռազմական մրցավազքին ուղղված քայլ չէ:
