Շուրջ 500 սիրիացի ընտանիքներ՝ յուրաքանչյուրում միջինը 6 անդամ, այս գիշեր հատել են Լիբանանի հետ սահմանը: Այս մասին հայտնում է Associated Press-ը:
Իր հերթին ՄԱԿ-ի Փախստականների հարցերով գործակալության ներկայացուցիչ Լիզա Աբու Խալեդը հայտնել է, որ Լիբանանի իշխանություններն առաջին անգամ թույլատրել են սիրիացի փախստականների համար ժամանակավոր ճամբար հիմնել:
Նրա խոսքով՝ մեկ գիշերում կազմակերպության աշխատողները 21 վրան են ամրացրել և ծրագրում են մինչև օրվա վերջ ևս 29-ը տեղակայել: «Մենք արտակարգ միջոցառումներ ենք ձեռնարկել՝ ստեղծված իրավիճակին համապատասխան»,- ասել է Խալեդը:
Նոյեմբերի 15-ից Սիրիայից Լիբանան է փախել առնվազն 13 հազար մարդ: Հոսքը սկսվել է այն բանից հետո, երբ կառավարական զորքերը սկսել են գրոհայիններից մաքրել ռազմավարական կարևորություն ունեցող Կալամունա տարածաշրջանը: Ընդհանուր առմամբ Լիբանանում գտնվում են շուրջ 1.4 մլն սիրիացի փախստականներ:
