18 մարդու մահվան պատճառ դարձած ավտովթարի մասնակից, Հայաստանի քաղաքացի Հրաչյա Հարությունյանի որդու՝ Սերոբ Հարությունյանի մահվան հանգամանքները պարզելու համար պապը՝ Վիկտոր Մարտիրոսյանը, նամակ է գրել նախագահ Սերժ Սարգսյանին:
«Բանակում երեխուն ծեծել են, գլխին են խփած եղել, ինչ-որ կապիտան Մարտիրոսյան է հարվածել, եկել է տուն, չկարողացանք փրկել: Վիրահատեցինք, ամբողջ գլուխն արդեն թարախ էր: Ուզում էին այդ գործը փակել, բայց ես բացեցի: Դատախազությունից արդեն նամակ եմ ստացել, որ իմ պահանջը կատարվելու է, գործով քննությունը կշարունակվի»,- ասաց նա:
Մարտիրոսյանը նշեց, որ բազմաթիվ նամակներ է ուղարկել՝ թե՛ Գլխավոր դատախազություն, թե Պաշտպանության նախարարություն, թե՛ նախագահին: Բոլորը, սակայն, հերքել են, թե տղայի մահվան պատճառ դարձած հիվանդությունը ծեծի հետևանք է: Ի վերջո, նա մի նոր նամակ է գրել նախագահին, որտեղ նշել է, որ Եվրադատարան է դիմելու, եթե տեսնի, որ մեր դատական համակարգն ի զորու չէ ճշմարտությունը բացահայտել: Այդ նամակից հետո միայն պատասխան է ստացել, որ իր պահանջը կատարվելու է, և կապիտան Մարտիրոսյանին 4-12 տարվա ազատազրկում կարող է սպառնալ:
Թոռանը հարվածող կապիտանին Վիկտոր Մարտիրոսյանը չի ճանաչում: «Չգիտեմ՝ ինքն ով է, չեմ ճանաչում, այդ մասին իմ թոռն էր ասել այն ժամանակ, երբ տանում էին վիրահատության: Խնդրեցինք, դրանից հետո նոր ասաց այդ մասին: Արդեն քանի ամիս է՝ ես այդ հարցով զբաղվում եմ: Փաստաբան չունեմ, դեռ թող դրան հերթը հասնի: Մենք բավական մեծ կորուստ ենք ունեցել՝ մարդկային կորուստ»,- ասաց նա՝ հավելելով, որ նյութական մեծ վնասներ ևս ունեցել են. մեկ ամսում հիվանդանոցում տասը հազար դոլար են ծախսել: Մարտիրոսյանի խոսքով՝ թոռանը հարվածներ հասցրած կապիտանը «պիտի կյանքով մեկ» պատասխան տա դրա համար:
Սերոբ Հարությունյանը գլխուղեղի ուռուցքից մահացել է զորացրվելուց մեկ տարի անց՝ 2012-ի մայիսին: 2011 թ. մայիսի 16-ին, ավարտելով ծառայությունը ԼՂՀ Քարվաճառի շրջանում և վերադառնալով տուն, Սերոբն անընդհատ գլխացավեր ու գլխապտույտ է ունեցել: Ամենատարբեր հիվանդանոցներում ախտորոշում չստանալուց հետո 2012-ի մայիսին Ուռուցքաբանության ազգային կենտրոնում երիտասարդի մոտ գլխուղեղի ուռուցք են հայտնաբերել: Երեք վիրահատությունից հետո Սերոբ Հարությունյանը մահացել է: Հարազատները պնդում են, որ հիվանդության պատճառը բանակում գլխին ստացած հարվածներն են եղել:
