Ժնևում երեկ սկսվել է Թեհրանի ու համաշխարհային տերությունների «վեցյակի» միջև բանակցությունների հերթական ռաունդը, որի արդյունքը կարող է դառնալ իրանական միջուկային ճգնաժամի կարգավորման մասին համաձայնագրի ստորագրումը: Երեկ բանակցային գործընթացի մասնակիցները հաստատել են տարաձայնությունների առարկա հանդիսացող հարցերի շուրջ փոխզիջում գտնելու վճռականությունը: Դա նշանակում է, որ բանակցային գործընթացը հասել է վերադարձ չունեցող կետի, և գործարքի կնքումը ժամանակի հարց է: Սակայն համաձայնագիրը վերջակետ չի դնի իրանական միջուկային խնդրին: Այն դեռևս չեն ընդունոմ Իսրայելն ու Սաուդյան Արաբիան, իսկ ԱՄՆ-ն ու նրա արևմտյան դաշնակիները չեն շտապում չեղյալ հայտարարել Իրանի դեմ հիմնական պատժամիջոցները:
Երեկ ժնևյան բանակցությունների ժամանակ մասնակիցները ոչ միայն զերծ են մնացել միմյանց հասցեին սովորական մեղադրական հռետորաբանությունից, այլև հաշտություն պարունակող մի շարք ժեստեր ու հայտարարություններ են արել բանակցային գործընթացն արդյունավետորեն ավարտի հասցնելու պատրաստակամության մասին:
Արևմուտքի հասցեին ոչ բնորոշ մեղմ հայտարարություններ է թույլ տվել Իրանի գերագույն առաջնորդ այաթոլլա Ալի Խամենեին: «Մենք ցանկանում ենք բարեկամական հարաբերություններ բոլոր երկրների, նույնիսկ ԱՄՆ-ի հետ: Մենք թշնամաբար չենք տրամադրված ամերիկացի ժողովրդի հանդեպ: Նրանք այնպիսին են, ինչպիսին մյուս ազգերը»,- ասել է այաթոլլան:
Իրանական կողմի առոգանության մեջ առկա փոփոխությունները «վեցյակի» ներկայացուցիչներին հնարավորություն են տվել հանդես գալ լավատեսական հայտարարություններով:
«Ակնկալում ենք, որ ջանքերը, որոնք ներկայումս ձեռնարկվում են, հաջողությամբ կպսակվեն Ժնևում հանդիպմանը»,- երեկ հայտարարել էր Ռուսաստանի արտգործնախարար Սերգեյ Լավրովը: Նման հայտարարություն էր արել նաև Չինաստանի նախագահ Սի Ցզինպինը՝ երեկ Իրանի նախագահ Հասան Ռուհանիի հետ հեռախոսազրույցում. «Չինաստանը հույս ունի, որ Իրանը կօգտվի երկխոսության շնորհիվ բացված հնարավորությունից՝ լավագույն արդյունքների հասնելու համար»:
Հաշվի առնելով, որ Իրանի հետ գործարքը խափանել չի հաջողվի, Իսրայելի վարչապետ Բենիամին Նեթանյահուն ձգտում է դրա պայմաններն առավելագույնս կոշտ դարձնել Թեհրանի համար: