ՀՀ կառավարության այսօր հրավիրված նիստից ժամեր առաջ օրակարգում ընդգրկվեց որոշման եւս մեկ նախագիծ, որը կոչվում է «Հայաստանի Հանրապետության կառավարության 2017 թվականի նոյեմբերի 9-ի N 1402-Ն որոշման գործողությունը մասնակի կասեցնելու մասին»: Ավելի կոնկրետ այն վերաբերում է դեղերը դեղատոմսով բաց թողնելուն։ Ու թեև սոցցանցերում և հասարակության շրջանում ակտիվորեն քննարկվում և տարածքվում է, որ կառավարությունը որոշել է չեղարկել դեղատոմսերի պարտադրանքը, սակայն դա այդպես չէ։ Կառավարության նիստի օրակարգ ընդգրկված նախագծում, պարզպես, չնչին փոփոխություններ են կատարվել։
Առողջապահության նախկին նախարար Արարատ Մկրտչյանը «Առաջին լրատվական»-ի հետ զրույցում ասաց, որ դեղատոմսերի ներդրման գործողությունը նոր որոշումով չի կասեցվելու։ Պարզապես շատ փոքր շտկում է կատարվել՝ էնդոկրին, ներզատական խնդիրների համար նախատեսված պրեպարատներն են հանվել դեղատոմսով բաց թողնվող դեղերի ցանկից։ Հետաձգվում է ներարկման պրեպարատների բացթողումը դեղատոմսով մինչև հուլիսի 1-ը, իսկ հակաբիոտիկների դուրսգրումը դեղատոմսերով պահպանվում է նաև այսօր կառավարության նիստում ընդգրկված կառավարության որոշումով։ «Ես որոշման նախագծին ծանոթացա, որեւէ էական փոփոխություն չկա։ Սակայն հարկ է արձանագրել, որ սա հերթական դեպքն է, երբ նախարարությունը փորձում է խնդիրը առաջ տանել, առանց լավագույնս նախապատրաստելու այն։ Սա հերթական նահանջն է։ Բայց հակաբիոտիկներից բացի, մնացած դեղերի մասով մինչև հուլիսի 1-ը նախարարությունը ժամանակ ունի և կարող է իրազեկման, կրթման ծրագրեր իրականացնել, պատրաստել բնակչությանը, քանի որ մարտի 1-ից առաջացած աղմուկը հենց անիրազեկվածության հետևանք է»,-ասաց նախկին նախարարը։
Մկրտչյանի խոսքով հենց անիրազեկվածության պատճառով է, որ դեղատներում խնդիր է առաջանում։ Դեղատոմսը կնքված չէ, դեղ չեն վաճառում, ասում են կնիք է պետք։ Բայց կառավարության որոշման մեջ գրված է կնիք, իսկ փակագծերի մեջ գրված է՝ առկայության պարագայում։ Այսինքն հնարավոր է բժշկի մոտ կնիք չլինի, դեղատոմս գրվի և դեղատան աշխատողը պարտավոր է դեղ վաճառել։
Ամեն դեպքում մեկ շաբաթ տևած խուճապային տրամադրությունների, գոյություն չունեցող որոշման մասին բարձրաձայնելու արդյունքում մարդիկ մի քանի ամսվա համար դեղորայք գնեցին՝ ծախսելով իրնեց վերջին կոպեկները «Հիմա՝ պարզվում է, դրա կարիքը չկար։ «Կրկնում եմ, որպեսզի այսպիսի վիճակ չառաջանար, պետք էր բնակչությանը նախապատրաստել, խնդիրը հանրայնացնել։ Հանգիստ կրթական ծրագրեր իրանացներ, որպեսզի և մարդիկ պատրաստ լինեին դրան, և բժիշկները, և դեղատան աշխատողները։ Հուսանք, որ մինչև հուլիսի 1 գոնե նախարարությունը շտկումներ կանի, հետևություններ կանի, քանի որ, կրկնում եմ, լայնածավալ ինտենսիվ աշխատանքի կարիք կա»,-եզրափակեց Առողջապահության նախկին նախարարը։
Նշենք, սակայն, որ այս նոր որոշման նախագիծն էլ է խառնաշփոթի պատճառ դարձել։ Բուժաշխատողները, դեղատան աշխատողները չեն հասկանում, թե ինչ փոփոխություն է կատարվել, ինչ որ որոշումէ ընդունվել, եբ է հրապարակվելու դեղերի նոր ցանկը, որպեսզի պարզ լինի, թե որ դեղն է դեղատոմսով բաց թողնվում, որը՝ ոչ։
Նշենք նաև, որ մարտի 1-ից առաջացած այս աղմուկը, դեղատոմսերի պահանջը դեղատների կողմից, դեռևս, անհիմն էր և անօրինական, քանի դեռ չկր կառավարության համապատասխան որոշումը։ Առողջապահության նախարարությունը նախատեսնում է այդ նախագիծը կառավարությանը ներկայացնել կառավարության միայն հաջորդ նիստում։
