Ազգային ժողովի ՀԱԿ խմբակցության պատգամավոր Նիկոլ Փաշինյանը այսօր ԱԺ նիստում 2014թ.-ի պետբյուջեն անվանեց «հուսահատ, անողնաշար»: Փաշինյանը մեջբերեց բյուջեի նկարագրման ՀՀ կառավարության բառապաշարը. հարվածային բառապաշարի մի հուժկու զինանոց՝ «զարգացնել, խթանել, բարձրացնել, հզորացնել, աջակցել, նպաստել, ամրապնդել, կատարելագործել, ընդլայնել, խորացնել, արդիականացնել, ներգրավել, բարեփոխել, կարգավորել, զորացնել, օժանդակել, նույնիսկ հանրահռչակել»։
ՀԱԿ պատգամավորի խոսքով՝ հենց այս խոսքերը կարելի է գտնել բյուջեի ուղերձում, բայց այդ փաստաթղթերին ծանոթանալիս հարց է ծագում՝ գործո՞ւմ է այս կառավարությունը, որովհետև ՀՀ-ի առաջ ծառացած ամենալուրջ մարտահրավերի՝ աղքատության մասին բյուջեի ուղերձում որևէ բառ չկա, նաև անդրադարձ չկա, թե ընթացիկ տարում Հայաստանում որքան է կազմում աղքատությունը, որքան է դառնալու այդ բյուջեի ծախսման արդյունքում։
Ստեղծված ընդհանուր տխուր պատկերը Փաշինյանը բացատրում է այսպես. կառավարությունը փող չունի, և նույնիսկ կարող է քննադատություն հնչել: «2008 թ.-ի ցուցանիշի չկատարման համար քննադատում ենք, բայց 2013-ի հունիսին կառավարությունն ընդունել է ռազմավարական փաստաթուղթ, որը կոչվում է միջնաժամկետ ծախսերի ծրագիր, և գրել է, որ բյուջեի եկամտային մասը պետք է լինի 1 տրիլիոն 146 մլրդ: Այսօր այդ ցուցանիշը միանգամից փոխվեց՝ անմիջապես 11 մլրդ նվազեցվեց»,- ասաց նա։
Փաշինյանն անդրադարձավ ֆինանսների նախարար Դավիթ Սարգսյանի արտահայտությանը, թե՝ քաղաքականություն է փոխվել, և նկատեց, որ քաղաքականությունն այնքան հաճախ է փոխվում, անգամ եզրակացնում ես, որ կառավարությունը ռազմավարություն չունի։
ՀԱԿ պատգամավորը հետաքրքրվեց՝ կառավարությունը ինչո՞ւ չունի գումար, այդյոք երկրում իրո՞ք գումար չկա: «Գումար կա, գլուխ են գովում, որ բոլոր տողերով եկամուտների ցուցանիշներն աճում են, բայց մի տող կա, որ 2001թ.-ից ինչ-որ տարօրինակ դինամիկաներ են ցույց տալիս. դա եկամուտների բաժնում իրավախախտումների համար գործադիր դատական մարմինների կողմից կիրառվող պատժամիջոցների հոդվածն է»,- ասաց նա՝ նկատելով, թե ինչպես է, որ մենք շատ ենք վճարում, բայց բյուջե քիչ գումար է մտնում։
Ըստ պատգամավորի՝ գործազրկության ավելի խայտառակ թվեր կան, բայց այդ մասին արդեն խոսվել է: Փաշինյանը նշեց, որ դեմ է քվեարկելու բյուջեի նախագծին, որովհետև չի կարող կողմ քվեարկել մի փաստաթղթի, որտեղ հընթացս արձանագրվում է՝ զորակոչիկների թիվը պակասել է ու շարունակելու է պակասել, աշակերտների, ծնունդների թիվը՝ նույնպես։
«Հիմա կարող է հարց հնչել. մի՞թե այդ 1200 էջանոց բյուջեում մի կետ չկա, որ այսօրվա դրությամբ լավատեսություն ներշնչի։ Կա, մի փոքր կետ պարունակում է՝ դա այն է, որ կառավարության ռիսկերի մեջ հնարավոր է համարել մեր քաղաքական անկայունությունները։ Ճիշտ է, մեր քաղաքական անկայունությունն այդքան էլ լավ բան չի, բայց երբ որ համատարած ինչ-որ ճահճային վիճակ է, մարդիկ փորձում են հույս փնտրել այդպիսի տեղերում։ Այս է պատճառը, որ հանրության շրջանում Շանթ Հարությունյանի և նրա ընկերների գործունեությունը դրական արձագանքի է արժանանում, որովհետև մարդիկ տեսնում են՝ այս կառավարության բոլոր ճանապարհները փակ են»,- ասաց նա՝ նշելով, որ դա հատուկ պարտավորություն է դնում ընդդիմության վրա: