Եգիպտացի մոգերն աջակցել են գեներալ Աբդելֆաթահ Ալ-Սիսիին տապալված նախագահ Մուհամմադ Մուրսիի կողմնակիցների հետ քաղաքական դիմակայությունում՝ հաղորդում է IslamNews-ը:
Եգիպտացի հայտնի պայծառատես Գուի Իյադը, որ վերջերս հաճախ է հայտնվում եգիպտական կենտրոնական հեռուստաալիքներում, հայտարարել է, որ «Մուսուլման եղբայրները» փորձել է կախարդել իր հետևորդներին և ամբողջ Եգիպտոսը՝ խորհրդանիշ ընտրելով «Ռաբիա» նշանը: Այս խորհրդանիշը աջ ձեռքի պարզած ափ է՝ վեր բարձրացրած չորս մատներով և ծալած բութ մատով:
«Ռաբիան» դարձել է իսլամական քաղաքական ուժերի կողմնակիցների դիմադրության խորհրդանիշն ընդդեմ ռազմական ռեժիմի Կահիրեում՝ Ռաբիա Ալ-Ադավիա հրապարակում: Նշենք, որ «ռաբիա» (ռաբաա) բառն արաբերենում նշանակում է «չորս» կամ «չորրորդ»:
Մուսուլմանական աշխարհի ոչ կառավարական կազմակերպությունների միավորման գլխավոր համակարգող Չիհանգիր Իզիլիրի խոսքով՝ «Ռաբիա» ժեստը բառերն են, որ մուսուլմանական աշխարհն ասում է մնացած աշխարհին՝ «Այսուհետ մենք ասելու բան ունենա»: Սակայն եգիպտացի պայծառատեսը նրա հետ համամիտ չէ:
«Քառյակը եգիպտացի ժողովրդին բարիք է բերում և չարիք՝ «Մուսուլման եղբայրներին»,- ասել է նա և որպես ապացույց բերել այն փաստը, որ «Եղբայրների» գերագույն հոգևոր առաջնորդ Մուհամմադ Բադիան ձերբակալվել է չորրորդ հարկում գտնվող 84-րդ համարի տանը:
Նա նաև նշել է, որ չորս թիվը «Ղուրան», «Աստվածաշունչ», «Թորա» և «գուշակում» բառերի համագումարն է:
«Ռաբիա խորհրդանիշը երկու գույն է պարունակում՝ սև, որը խորհրդանշում է ատելություն, և դեղին՝ մասոնների խորհուրդ»,- եզրափակել է պայծառատեսը:
