ԱՄՆ-ը և ԵՄ-ն երեկ վերսկսել են բանակցությունները ազատ առևտրի անդրատլանտյան գոտու ստեղծման շուրջ: Բանակցությունների երկրորդ ռաունդի օրակարգում երկկողմ առևտրի առավել խնդրահարույց թեմաներն են՝ սպառողների իրավունքների պաշտպանության և գաղտնի տվյալների փոխանցման տեխնիկական նորմերի ներդաշնակեցումը, ինչպես նաև ֆինանսական ծառայությունների շուկայի կարգավորումը: Այս մասին հայտնում է Kommersant-ը:
Անդրատլանտյան առևտրային և ներդրումային գործընկերության բանակցությունների երկրորդ ռաունդը անցկացվում է Բրյուսելում՝ նոյեմբերի 11-15-ը: Այդ մասին երեկ հայտնել են ԵՄ-ի և ԱՄՆ-ի պաշտոնական ներկայացուցիչներ Իգնասիո Գարսիա-Բերսերոն և Դեն Մալանին: Բանակցությունների մեկնարկը տրվել էր բրիտանական Լոխ-Էրնում անցկացված «մեծ ութնյակի» վերջին գագաթնաժողովին: Այն ժամանակ կողմերը խոստացել էին վերացնել բոլոր տարաձայնությունները մինչև 2014-ի վերջը: Առաջին երկկողմ հանդիպումն անցկացվել էր հուլիսին, երկրորդ ռաունդը ծրագրվել էր ավարտել հոկտեմբերին, սակայն ԱՄՆ-ի կառավարության աշխատանքը ժամանակավորապես կանգ էր առել բյուջետային ճգնաժամի, ինչպես նաև ամերիկյան հատուկ ծառայությունների կողմից եվրոպացի քաղաքական գործիչների գաղտնալսման սկանդալի պատճառով:
Ինչպես սպասվում է, էլեկտրոնային տվյալների փոխանակության կարգավորումն ու կողմերի մտավոր իրավունքների պաշտպանությունը կքննարկվեն առևտրային պակտի շրջանակում: Google-ն ու Microsoft-ը բազմիցս բախվել են եվրոպական շուկայում հասանելիության սահմանափակումների՝ ԵՄ երկրների կողմից գաղտնի տեղեկատվության հետ աշխատանքի առավել կոշտ նորմերի կիրառման պատճառով: Ոչ պակաս սուր թեմա է սննդամթերքի անվտանգության պահանջներում առկա տարբերությունը:
Տուրքերը փաստացի այժմ էլ գտնվում են ցածր մակարդակի վրա՝ միջինն ընդամենը 4 տոկոս: Հիմնական առևտրին խոչընդոտում են չափորոշիչների տարբերությունները, ինչպես նաև սպառողների պաշտպանության նորմերը: Դրանց վերացումը կարող է 10-20 տոկոսով էժանացնել ներկրումը:
Եվրահանձնաժողովի գնահատականով՝ ԵՄ-ից արտահանումը կարող է աճել 6, իսկ ԱՄՆ-ից՝ 8 տոկոսով (դրամական արտահայտմամբ՝ 220 և 240 միլիարդ եվրո):
ԵՄ-ից տրանսպորտային միջոցների արտահանումը կարող է աճել 149 տոկոսով՝ հույս ունեն Եվրահանձնաժողովում, սակայն դա տեղի կունենա միայն այն դեպքում, եթե ԱՄՆ-ը համաձայնի լիովին ներդաշնակեցնել տեխնիկական չափորոշիչները:
Տնտեսական հետազոտությունների լոնդոնյան կենտրոնի գնահատականով՝ ԵՄ-ն կարող է գործարքից շահել տարեկան 119 միլիարդ դոլար: ԱՄՆ-ում գլխավորապես ակնկալում են զբաղվածության մեծացում. Atlantic Council-ի փորձագետներն ակնկալում են, որ կբացվի 750 հազար նոր աշխատատեղ:
