Արարատի և Վայոց Ձորի մարզերի ընդհանուր իրավասության դատարանում Գագիկ Սարգսյանի նախագահությամբ ընթանում է Կարեն Գևորգյանի գործի դատավարությունը:
Արարատի մարզի Այգավան գյուղի 31-ամյա բնակիչ Կարեն Գևորգյանին շրջապատում «Կեպակ» են ասում: Նա 2012 թվականին խուլիգանություն էր կատարել իրենց գյուղի գիշերային ակումբում, իսկ արդեն 2013 թվականին՝ ընդհանուր իրավասության դատարանի նիստերի դահլիճում:
Այսպիսի «աճ» ունենալով իր անձի «դրսևորման» տեսակետից՝ «Կեպակը» այս տարի հասցրել է ամբաստանյալ լինել հիշյալ երկու քրեական գործով էլ: Նախորդ գործով արդեն կայացվել է դատավճիռը, իսկ երկրորդ գործի դատական քննությունն ընթացքի մեջ է:
Գիշերային ակումբում կատարված խուլիգանության գործի դատական քննության ժամանակ՝ 2013 թվականի մայիսի 31-ին, ժամը 14-ն անց 30-ին «Նուբարաշեն» ՔԿՀ-ի կալանավոր, գործով ամբաստանյալ Կարեն Գևորգյանը Արարատի և Վայոց Ձորի մարզերի ընդհանուր իրավասության դատարանի Վեդիի նստավայրում, դատական նիստերի դահլիճում վկայություն տվող Է. Հակոբյանի հետ վիճաբանության մեջ է մտել, բռնություն գործադրելու սպառնալիքներ տվել, հայհոյել վկայի հասցեին, ապա սեղանի վրայից վերցրել է բարձրախոսն ու նետել վկա Հակոբյանի ուղղությամբ, բայց բարձրախոսն ամրացված է եղել համակարգչին ու վկային չի դիպել:
Դատարանի դահլիճում ամբաստանյալի կողմից կատարված այս արարքը նախաքննական մարմինը որակել է որպես խուլիգանություն և մեղադրանք է առաջադրել ՀՀ քրեական օրենսգրքի 258 հոդվածի 2-րդ մասով:
Դատարանի դահլիճում ցուցաբերած վարքագիծը Կարեն Գևորգյանին զերծ չի պահել մեղադրական դատավճռից: Արարատի և Վայոց Ձորի մարզերի ընդհանուր իրավասության դատարանի դատավճռով Կարեն Գևորգյանը դատապարտվել է 2012 թվականի ապրիլի 1-ի գիշերը Արարատի մարզի Այգավան գյուղում գործող «Ժորա Մելքոնյան» ՍՊԸ-ի գիշերային ակումբում խմբի կազմում բռնությամբ զուգորդված խուլիգանություն կատարելու համար:
Նա մեղավոր է ճանաչվել խուլիգանության մեկ այլ մասով՝ ՀՀ քրեական օրենսգրքի 258 հոդվածի 3-րդ մասի 1-ին կետով ու դատապարտվել է 4 տարի ազատազրկման:
Պատժի սկիզբը՝ 2012 թվականի նոյեմբերի 20-ից: Գևորգյանից հօգուտ պետբյուջեի կբռնագանձվի 2 միլիոն 295 հազար 128 դրամ՝ որպես դատական ծախս, քանի որ հետախուզման մեջ գտնվող Գևորգյանին Մոսկվայում էին հայտնաբերել ու տեղափոխել Երևան:
