Տորոնտո քաղաքում մի խումբ երիտասարդ հայեր հացադուլ են հայտարարել Թուրքիայում կայանալիք ընտրությունների նախօրեին՝ բողոքելով այդ երկրում մարդու իրավունքների զանգվածային խախտումների դեմ՝ Հայոց ցեղասպանության փաստի մերժում, խոսքի և մամուլի ազատություն, կրոնական և էթնիկական փոքրամասնությունների իրավունքների խախտում, քաղաքական կուսակցությունների արգելում և այլն: Այս մասին հաղորդում է «Ասպարէզ» պարբերականը:
Միջոցառումը կազմակերպել է Կանադայի Հայկական երիտասարդական ֆեդերացիան, որի ակցիան կտևի 72 ժամ: Ակցիայի մասնակիցներից Մարկ Պիլիգյանն ասել է, որ այս քայլով իրենք ցանկանում են կանադական հասարակությանը ներկայացնել այն աղետը, որ վերապրել է հայ ժողովուրդը 20-րդ դարի սկզբին: «Թուրքական կառավարությունը պետք է ճանաչի և հաշտվի իր պատմության հետ, որպեսզի ցեղասպանության պես հանցանքներն այլևս չկրկնվեն»,- ասել է նա:
Հացադուլը կավարտվի հունիսի 13-ին թուրքական հյուպատոսության դեմ բողոքի ակցիայով: