ՀՀ տարածքային կառավարման և զարգացման նախարար Դավիթ Լոքյանը հունվարի 31-ին ընդունել է ՀՀ-ում Քուվեյթի Պետության արտակարգ և լիազոր դեսպան Նաուաֆ Ալ Էնեզիին: Հանդիպմանը մասնակցել է նաև ՀՀ ԱԳ նախարարության Մերձավոր և Միջին Արևելքի վարչության Արաբական թերակղզու երկրների բաժին պետ Մհեր Մկրտումյանը: Այս մասին տեղեկացրին ՀՀ տարածքային կառավարման և զարգացման նախարարության հասարակայնության հետ կապերի բաժնից:
Ողջունելով դեսպանին` նախարարը նշել է, որ Քուվեյթի Պետությունն իր համար հաճելի և բարեկամ երկրներից մեկն է և բազմիցս Քուվեյթում ականատես է եղել հայազգի բնակչության նկատմամբ դրական վերաբերմունքին:
Այնուհետև անդրադառնալով հայ-քուվեյթյան հարաբերություներին, մասնավորապես՝ տնտեսական և տեխնիկական համագործակցության հայ-քուվեյթյան միջկառավարական համատեղ հանձնաժողովի գործունեությանը, նախարարն ասել է, որ քաղաքական և մարդկային առումով հարաբերությունները հստակ են. արդեն կայացել է միջկառավարական հանձնաժողովի 2 նիստ, երկկողմանի այցելություններ են եղել և արդյունքում ստորագրվել են երկկողմ համագործակցության բազմաթիվ փաստաթղթեր: «Սա արդեն լուրջ հիմք է տարբեր ուղղություններով ակտիվ համագործակցության համար: Հայկական կողմից կա դրական վերաբերմունք այն շարունակելու համար և այս տարի Երևանում կազմակերպվելիք միջկառավարական համատեղ հանձնաժողովի 3-րդ նիստին այսօրվանից պետք է լավագույնս պատրաստվենք, որպեսզի մեր բոլոր գերատեսչությունները և նաև մասնավոր հատվածը արդյունավետ կերպով ներգրավվի այս գործընթացի մեջ: Մենք պետք է խնդիր դնենք մեր առջև. ապրանքաշրջանառությունը մեծացնենք և տնտեսական կապերը նոր մակարդակի հասցնենք»,-ասել է Դ. Լոքյանը:
Դեսպան Աբդուլլահ Ալ Էնեզին իր հերթին շնորհակալություն է հայտնել ջերմ ընդունելության համար, նույնպես նկատել, որ տնտեսական կապերը դեռևս բավարար մակարդակի չեն և վստահեցրել, որ պատրաստակամ է զարգացնելու Հայաստանի հետ առևտրատնտեսական հարաբերությունները: «Այս հարցում ես կարևորում եմ երկու երկրների առևտրաարդյունաբերական պալատների ակտիվ աշխատանքը, կարող եմ հայտարարել, որ մշտապես կապի մեջ եմ Քուվեյթի ներդրումային հիմնադրամի ներկայացուցիչների հետ, որոնք պատրաստ են համագործակցել Հայաստանի իշխանությունների հետ՝ որևէ ոլորտում ներդրում կատարելու համար»,-ասել է դեսպանը:
Նախարար Լոքյանը ներկայացրել է գյուղատնտեսության, ձկնաբուծության, փոքր ջրամբարների կառուցման, առողջապահության, դեղագործության, զբոսաշրջության և մի շարք այլ ոլորտներում իրատեսական ծրագրերի առաջարկներ, հայտարարել, որ դրանք առանձին փաթեթների տեսքով ՀՀ վարչապետի հետ քննարկունից հետո պատրաստ է փոխանցել քուվեյթյան կողմին: «Մենք պատրաստ ենք տարաբնույթ առաջարկներով հանդես գալ և Քուվեյթի ներդրումային հիմնադրամի հետ համագործակցել այնպիսի սկզբունքներով, որ դա փոխադարձ շահավետ լինի: Կարծում եմ ժամանակ է անցնելու ավելի գործնական, ավելի պրակտիկ քննարկումների, որպեսզի մինչև հաջորդ միջկառավարական նիստը արդեն որոշակի արդյունքներ ունենանք»,-ասել է Դավիթ Լոքյանը` հավելելով, որ նոյեմբերին կայանալիք նիստին ընդառաջ անհրաժեշտ է շարունակել հանդիպումները և սահմանել աշխատանքների հստակ ժամանակացույց: Դեսպան Աբդուլլահ Ալ Էնեզին ոգևորությամբ է ընդունել նախարար Լոքյանի՝ առաջիկայում Քուվեյթի ներդրումային հիմնադրամի ներկայացուցիչների հետ հանդիպում կազմակերպելու առաջարկը, որը հնարավորություն կընձեռի ներկայացնել գյուղատնտեսության ոլորտում ներդրումային ծրագրերի առաջարկները:
Դեսպանն իր գոհունակությունն է հայտնել հանդիպումից, առաջարկել ստեղծել աշխատանքային խումբ և ակտիվ աշխատել հայ-քուվեյթյան միջկառավարական համատեղ հանձնաժողովի հերթական նիստը բարձր մակարդակով կազմակերպելու համար: Հանդիպման ժամանակ քննարկվել են երկկողմանի հետաքրքրություն ներկայացնող այլ հարցեր, պայմանավորվածություն է ձեռք բերվել ՀՀ արտաքին գործերի գերատեսչության հետ միասին աշխատել երկկողմանի հարաբերությունները բավարար և գոհացուցիչ մակարդակի բերելու ուղղությամբ:
