ՀՀ գյուղատնտեսության փոխնախարար Աշոտ Հարությունյանը գենետիկորեն ձևափոխված օրգանիզմները գիտության զարգացման արդյունք է համարում: ՀՀ գյուղատնտեսության փոխնախարարը նման կարծիք հայտնեց ազգային ժողովում «Գենետիկորեն ձևափոխված օրգանիզմներ. այլընտրանք, թե պարտադրանք» թեմայով խորհրդարանական լսումների ընթացքում: «Մինչև 2012 թ. կատարված վերլուծությունների արդյունքները ցույց են տվել, որ աշխարհի 29 երկրներում գենետիկորեն ձևափոխված սերմերով մշակվում է շուրջ 170 միլիոն հեկտար տարածք, որից Ամերիկայի Միացյալ Նահանգներում` 69 միլիոն հեկտար:
Այսինքն՝ աշխարհի մշակվող հողերի գրեթե 10 տոկոսը գենետիկորեն ձևափոխված մշակաբույսերով է զբաղեցված»,- նշեց փոխնախարարը:
Խնդրին Հայաստանի Հանրապետության տեսանկյունից անդրադառնալով` Աշոտ Հարությունյանն ընդգծեց, որ մեր երկրում հողային սահմանափակ ռեսուրս կա: «Այդ առումով մեր հիմնական նպատակն է Հայաստանում զարկ տալ օրգանիկ գյուղատնտեսությանը, որպեսզի մենք կարողանանք աշխարհի շուկայում ունենալ մեր ուրույն տեղը մեր բարձրորակ մթերքներով: Եթե մեր արտադրանքը համեմատում ենք այլ երկրների արտադրանքի հետ, ինքնարժեքի տեսանկյունից այն մրցունակ չէ: Սա նշանակում է, որ մենք պետք է վերցնենք օրգանիկ գյուղատնտեսության անցնելու ճանապարհը: Եթե մենք գնանք այդ ճանապարհով, պետք է մանրամասն ուսումնասիրենք, թե որտեղ խնդիր ունենք, որտեղ ռիսկեր կան, որպեսզի դրանք համադրենք և ճիշտ քայլեր իրականացնենք»,- եզրափակեց Աշոտ Հարությունյանը:
