ՀՀ գլխավոր դատախազի տեղակալ Արմեն Հարությունյանը ՀՀ դատախազության 2017 թվականին գործունեության արդյունքների ամփոփման շրջանակներում խորհրդակցություն է անցկացրել ՀՀ Շիրակի մարզի դատախազությունում: Ինչպես տեղեկացրին ՀՀ դատախազության հանրային կապերի բաժնից, խորհրդակցությանը մասնակցել են Շիրակի մարզպետ Արթուր Խաչատրյանը, Շիրակի մարզի ընդհանուր իրավասության դատարանի նախագահ Գագիկ Հովհաննիսյանը և մարզի իրավապահ մյուս մարմինների ու դրանց ստորաբաժանումների ղեկավարները:
Շիրակի մարզի դատախազի կողմից ներկայացվել է 2017 թ. ընթացքում մարզում հանցավորության ընդհանուր վիճակը, դրա դեմ քրեաիրավական պայքարի ցուցանիշները, խնդիրները, արձանագրված հանցագործությունների դեպքերով իրականացված հետաքննության և նախաքննության օրինականության նկատմամբ դատախազական հսկողության հիմնական արդյունքները:
Վեր են հանվել հանցագործության կատարմանը նպաստող պատճառները ու պայմանները, ներկայացվել են դատախազության աշխատակիցների կողմից դրանց չեզոքացման ուղղությամբ ձեռնարկված միջոցառումներն ու արդյունքները:
ՀՀ գլխավոր դատախազի տեղակալի կողմից բարձր է գնահատվել Շիրակի մարզի դատախազության աշխատանքները, հատկապես կարևորվել է կոռուպցիոն բնույթի հանցագործությունների դեմ պայքարում մարզի դատախազության ծավալած գործունեության արդյունավետությունն ու այդ ոլորտում արձանագրված բարձր ցուցանիշները:
