Սիրիայում կառավարական զորքերի և ապստամբների միջև դիմակայությունը երկրին հասցրել է 103.1 մլրդ դոլարի վնաս: Այս մասին հայտարարել է պաղեստինցի փախստականների օգնության և աշխատանքների կազմակերպման հարցերով ՄԱԿ-ի մերձավորարևելյան գործակալության միկրոֆինանսավորման ծրագրի ղեկավար Ալեքս Պոլոկը՝ փոխանցում է Interfax-ը:
New America Foundation ինստիտուտում Սիրիայում սոցիալ-մշակութային իրավիճակի մասին զեկույց ներկայացնելիս Պոլոկը նշել է, որ կործանարար ճգնաժամի հետևանքով արդյունաբերությունն այդ երկրում գրեթե կանգ է առել:
Նրա խոսքով՝ գործազուրկ սիրիացիների թիվը հասել է 2.33 միլիոնի: Սիրիայում մնացած բնակչության մեծ մասն ապրում է աղքատության մեջ: Պոլոկը նշել է, որ Սիրիայի բնակչության ընդհանուր թիվը նվազել է 8 տոկոսով:
Նա նշել է, որ կրթությունը գլխավոր ոլորտներից մեկն է, որին հարվածել է զինված հակամարտությունը: Կործանվել կամ վնասվել է ուսումնական հաստատությունների մոտ 3000 շենք: Սիրիացի երեխաների 49 տոկոսը չի կարողանում ավարտել դպրոցը:
Սիրիայում իրավիճակը շարունակում է վատթարանալ, իսկ փախստականների թիվը հասել է 9.3 միլիոնի: Այդ մասին երկուշաբթի ՄԱԿ ԱԽ-ի փակ խորհրդակցությունների ժամանակ ասել է համաշխարհային կազմակերպության գլխավոր քարտուղարի տեղակալ Վալերի Ամոսը: Հաղորդվում է, որ փախստականների 6.5 միլիոնը ներքին տեղահանվածներ են:
