Քեմբրիջի դուքս Ուիլյամն ու դքսուհի Քեյթ Միդլթոնը զերծ են մնում երրորդ երեխայի ծննդյան նախապատրաստությունների վերաբերյալ մեկնաբանություններից։ Հանրությունը տեղեկություններ է ստանում միայն մամուլից։ Օրերս ներքին աղբյուրները հայտնել էին այն մասին, որ Միդլթոնն իբրև թե չի ծրագրում ծննդատուն ուղևորվել։ Այդ իսկ պատճառով լրագրողները պետք է պարեկեն ոչ թե սուրբ Մարիամի հիվանդանոցի, այլ թագավորական նստավայրերից մեկի պատերի մոտ։
«Քեթրինն ընկերներին հայտնել է, որ ցանկանում է ծննդաբերել տնային միջավայրում։ Նա արդեն քննարկել է դա Ուիլյամի հետ, և նա աջակցել է նրան այդ որոշման մեջ։ Նրանց երկուսին դուր է գալիս այդ գաղափարը։ Բացի այդ, դա թույլ կտա խուսափել հիվանդանոցի պատերի մոտ զանգվածային աղմուկից»,-ասել է Միդլթոնի շրջապատի իրազեկ աղբյուրը։
Նշենք, որ Մեծ Բրիտանիայի թագուհին ծնվել է իր պապիկի լոնդոնյան նստավայրում, իսկ նրա որդիները՝ Բուքինգեմյան պալատում, դուստր Աննան՝ Քլարենս-հաուսում։
