Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ սկսվում է Լուսիկ Փաշայանի, Մելինե Սարգսյանի և Հասմիկ Չլոյանի գործի դատավարությունը:
38-ամյա Լուսիկը և 27-ամյա Մելինեն քույրեր են, իսկ 59-ամյա Հասմիկը նրանց մայրն է: Երեքն էլ մեղադրվում են խուլիգանության համար՝ ՀՀ քրեական օրենսգրքի 258 հոդվածի 3-րդ մասի 1-ին կետով:
Ըստ մեղադրանքի՝ 2013 թվականի ապրիլի 28-ին, առավոտյան ժամը 9-ին Լուսիկ Փաշայանը քրոջ՝ Մելինեի ու մոր՝ Հասմիկի հետ վիճելի տան հետ կապված հարցերով կռվել են իրենց հետ նույն հասցեում հարևանությամբ բնակվող Լիլիթ Պ.-ի հետ:
Առաջադրված մեղադրանքի համաձայն՝ մոտ մեկ ժամ տևած կռվի ընթացքում խուլիգանություն կատարող կանայք հնչեցրել են հայհոյանքներ, անհարգալից վերաբերմունք են դրսևորել թաղամասի բնակիչների նկատմամբ:
Վերջիններիս միջամտությամբ անգամ կռիվը չի դադարեցվել, ևս տասնհինգ րոպե խանգարվել է մարդկանց անդորրը:
Նույն կազմով՝ Լուսիկը, Մելինեն ու Հասմիկը, մայիսի 2-ի ցերեկը մտել են Լիլիթ Պ.-ի տան բակ, մոտ քառասուն րոպե հայհոյանքներ են հնչեցրել:
Լուսիկ Փաշայանը, ըստ մեղադրանքի, ապակե տարայով հարվածել է Լիլիթի ձախ թևին, իսկ Մելինեն ու Հասմիկը հրել են պահարանը, որի վրա եղած փայտն ընկել է նույն Լիլիթի գլխին:
Վերջինիս պատճառվել են առողջության թեթև վնասի հատկանիշներ չպարունակող վնասվածքներ:
Հարևանների միջամտությունը դարձյալ անզոր է եղել անմիջապես դադարեցնել միջհարևանական «մարտական» գործողությունները: Դրա համար մոտ տասնհինգ րոպե է պահանջվել:
Նույն ընտանեկան եռյակով՝ Լուսիկը, Մելինեն, Հասմիկը, հունիսի 30-ին մտել են Լիլիթ Պ.-ի բակ, հայհոյել ու բռնություն գործադրելու սպառնալիքներ են հնչեցրել: Մելինեն, ըստ մեղադրանքի, ճանկռել է հարևանուհու թևերը, բռունցքներով էլ հարվածել է նրա մարմնի տարբեր մասերին, պատճառել առողջության թեթև վնասի հատկանիշներ չպարունակող վնասվածքներ: Խուլիգանությունը շարունակվել է հարևանական «պատվիրակության» միջամտությունից հետո նույնպես՝ ինչպես միշտ՝ մոտ տասնհինգ րոպե:
Երեք կանայք երեք դրվագով հենց այնպես խուլիգանություն չէին անի: Բայց ինչ վիճելի հարց էլ ծառացած լինի այս տիկնանց ու նրանց հարևանուհու միջև, միևնույնն է, խուլիգանական գործողություններով այն չի լուծվելու: Խուլիգանական գործողությունների հետևանքն ահա սա է՝ քրեական հետապնդումն ու քրեական դատավարությունը: