Նացիստ հանցագործ Էրիխ Պրիբկեն, ում հուղարկավորության փորձը Հռոմում մեծ սկանդալ առաջացրեց, գաղտնի հուղարկավորվել է Իտալիայի բանտերից մեկի լքված գերեզմանատանը: Այս մասին հաղորդում է La Repubblica թերթի գլխավոր խմբագիր Էցիո Մաուրոն:
Երկրորդ աշխարհամարտի տարիներին Պրիբկեն ծառայել է Իտալիայում և մասնակցություն է ունեցել 1944թ. Հռոմում 335 իտալացիներին մահապատժի ենթարկելու գործում: Պատերազմից հետո նա փախել է Արգենտինա, որտեղ նրան գտել են 50 տարի անց և արտահանձնել Իտալիա: Դատարանը նախկին էսէսականին դատապարտել է ցմահ ազատազրկման: Պրիբկեն մահացել է հոկտեմբերի 11-ին՝ 100 տարեկանում, Հռոմում, որտեղ ենթարվել էր տնային կալանքի:
Հռոմի քաղաքային իշխանությունները կտրականապես հրաժարվում էին հուղարկավորել նացիստ հանցագործին մայրաքաղաքի տարածքում: Համանման դիրքորոշում են ցուցաբերել նաև Արգենտինան և Գերմանիան, որոնք մտավախություն ունեին, որ Պրիբկեի հուղարկավորության վայրը կդառնա ուխտատեղի նեոնացիստների համար:
Հոկտեմբերի 16-ի գիշերը Պրիբկեի աճյունը գաղտնի տեղափոխվել է Հռոմի մոտ գտնվող ռազմական օդանավակայան: Դրանից հետո այս թեմայի վերաբերյալ ոչ մի տեղեկատվություն չի հրապարակվել:
Մաուրոյի տվյալներով՝ օրերս Պրիբկեի աճյունը հուղարկավորվել է իտալական բանտերից մեկի գերեզմանատանը, որն ավելի քան 20 տարի չի օգտագործվել: Գերեզմանոցի վրա տեղադրվել է փայտե խաչ՝ առանց անվան և մահվան տարեթվի: Ո՛չ բանտարկյալները, ո՛չ ուղղիչ հաստատության աշխատակիցները չգիտեն, թե ով է հուղարկավորված այդտեղ:
