Նոյեմբերի 6-ին ՀՀ ազգային ժողովում տեղի ունեցավ ՀՀ ազգային ժողովի և ՌԴ դաշնային ժողովի միջև համագործակցության միջխորհրդարանական հանձնաժողովի 23-րդ նիստը։
Նիստի համանախագահներն են ՀՀ ազգային ժողովի փոխնախագահ Հերմինե Նաղդալյանը և ՌԴ դաշնային ժողովի սենատոր Նիկոլայ Ռիժկովը:
Միջխորհրդարանական հանձնաժողովի նիստը նվիրված է եղել Հայաստանի և Ռուսաստանի միջև տրանսպորտային ոլորտի խնդիրներին։
«Ռուսաստանի և Հայաստանի միջև տրանսպորտային հաղորդակցության բարելավման խնդիրը» թեմայով զեկուցումով հանդես եկան ՀՀ տրանսպորտի և կապի նախարարի տեղակալ Արտաշես Ավետիսյանը, ՌԴ տրանսպորտի նախարարի տեղակալ Սերգեյ Արիստովը և «Հարավկովկասյան երկաթուղի» ՓԲԸ գլխավոր տնօրենի պաշտոնակատար Սերգեյ Վալկոն:
Նիստի վերջում հանդիսավոր պայմաններում ԱՊՀ երկրների տրանսպորտի համակարգող խորհրդի նախագահ, ՌԴ տրանսպորտի նախարար Մ. Սոկոլովի անունից՝ Կազմակերպչական բարձր հմտությունների, տրանսպորտի ոլորտում ԱՊՀ անդամ երկրների համագործակցության գերակա ուղղությունների իրականացման գործում ունեցած նշանակալի ավանդի համար «ԱՊՀ պատվավոր տրանսպորտայինի» կոչում և հուշամեդալ շնորհվեց ՀՀ տրանսպորտի և կապի նախարար Գագիկ Բեգլարյանին։
Քանի որ նախարար Գագիկ Բեգլարյանը գտնվում է պաշտոնական գործուղման մեջ՝ ՌԴ տրանսպորտի նախարարի տեղակալ Սերգեյ Արիստովը պարգևը փոխանցեց ՀՀ տրանսպոտի և կապի նախարարության աշխատակազմի ղեկավար Գագիկ Գրիգորյանին։
