Հանգստյան օրերին Բեռլին է մեկնել WikiLeaks-ի լրագրողուհի Սառա Հարիսոնը, ով եկար ժամանակ օգնել է Էկվադորի դեսպանատանը թաքնվող Ջուլիան Ասանժին: Իսկ վերջին ամիսներին նա մշտապես եղել է ԿՀՎ նախկին աշխատակից Էդվարդ Սնոուդենի հետ: Այս մասին գրում է Spiegel Online-ը:
Հայտնի չէ, թե ինչու է բրիտանացի լրագրողուհին մեկնել հենց Գերմանիա և որքան կմնա այնտեղ: Բեռլին ժամանելուն պես՝ WikiLeaks-ի տեղի կողմնակիցները նրան տարել են անհայտ ուղղությամբ: Հարիսոնը, պատասխանելով պարբերականի լրագրողի հարցին, ասել է, որ մտադիր չէ Սնոուդենի շուրջ տիրող իրավիճակի մասին հարցազրույց տալ, քանի որ այդպիսով վտանգի կենթարկի վերջինիս կյանքը:
Հարիսոնի՝ ՌԴ-ից մեկնելու պատճառների մասին միայն կարելի է ենթադրել: Ավելի վաղ WikiLeaks կայքում նրա հրապարակած հաղորդագրություններից մեկում նշվում է, որ Սնոուդենն առաջիկա ինն ամիսներին՝ մինչ Ռուսաստանում ապաստանելու ժամկետի ավարտը, անվտանգության մեջ է, իսկ ինքը «դեռ անելու շատ գործեր ունի»: Լրագրողը չի նշում, թե դրանք ինչ գործեր են, սակայն հայտնի է, որ Սնոուդենը ցանկանում էր քաղաքական ապաստան կամ կացության վկայական ստանալ Գերմանիայում: Գերմանիայի իշխանությունները մերժել են նրան՝ վախենալով փչացնել հարաբերությունները ԱՄՆ-ի հետ:
Հարիսոնն ակնարկել է նաև, որ դեռ չի պատրաստվում վերադառնալ հայրենիք:
