«Եվրամիությունում սպասում են, թե Հայաստանն ինչպիսի նախաձեռնություններով հանդես կգա ստորագրված փաստաթուղթն իրականացնելու հետ կապված։ Մասնավորապես, սպասում են, որ մինչև այս ամսվա վերջ Հայաստանը կառաջարկի համաձայնագրի իրականացման ճանապարհային քարտեզի նախագիծ»,- «Առաջին լրատվական»-ի հետ զրույցում ասաց Երևանի մամուլի ակումբի ղեկավար Բորիս Նավասարդյանը։
«Ինչպես մենք հետևում ենք, մեր տեղեկությունների համաձայն՝ Հայաստանի իշխանական շրջանակներում այդ ուղղությամբ որևէ լուրջ աշխատանք չի իրականացվում։ Բնականաբար, առաջին հիասթափությունը կարող է լինել, եթե Հայաստանի կողմից որևէ լուրջ քայլերի առաջարկ չլինի։ Ես դժվարանում եմ ասել, թե դրան ինչ կարող է հետևել։ Մտավախություն ունեմ, որ հիասթափություն լինի նաև Հայաստանում՝ և՛ համաձայնագրի, և՛ Եվրամիության հետ համագործակցության առումով»,- ասաց մեր զրուցակիցը։
Բորիս Նավասարդյանը նշում է՝ հասարակության որոշ շրջանակներ ակնկալիքներ ունեն, և եթե մոտակա ամիսների ընթացքում բարեփոխումների իրականացման առումով այդ ակնկալիքները չիրականանան՝ մեր իշխանության նկատմամբ հիասթափությունը կարող է լրացվել Եվրամիության հետ կապված հիասթափությամբ. «Դա կնշանակի, որ համաձայնագիրը կարող է նույնիսկ բացասական դեր խաղալ։ Եթե լուրջ փոփոխությունների կարիք ունեցող հասարակությունը կորցնում է դրական զարգացումների իրականացման առումով տեսլականը՝ այդ հիասթափությունը բերում է ապատիայի, արտագաղթի։ Բավականին լուրջ խնդիրների առաջ ենք կանգնել, և նոյեմբերին ստորագրած այդ փաստաթուղթը որևէ խնդրի լուծում չի կարող լինել, այլ, ընդամենը, այսօրվա վիճակի բարդացնող հանգամանք»։
Հարցազրույցն ամբողջությամբ՝ տեսանյութում։
