«Պետությունը պարտավորություններ ունի զինծառայողների առողջության պահպանման, վերականգնման հարցում, բայց հնարավորությունները քիչ են, պատերազմող երկիր ենք, պիտի հասկանանք։ Բանակը հանգիստ թողեք իր գործերով զբաղվի, ամեն վայրկյան կարող է պատերազմ լինել»։ Այդ մասին «Առաջին լրատվական»-ի հետ զրույցում ասաց «Սև հովազ» ջոկատի հրամանատար Ռուստամ Գասպարյանը՝ անդրադառնալով Վիգեն Սարգսյանի կոչին վիրավոր զինծառայող Ալբերտ Դալլաքյանի վիրահատության համար դրամահավաքին միանալու վերաբերյալ։
«Վիգեն Սարգսյանը էսօր օգնության ձեռք է պարզել, բոշայություն անվանել չի կարելի, էդ տղան իր անձնականի համար սահմանում չի եղել, մարտական հերթապահություն է կատարել, դեպք է պատահել, դատաքննությունը անզգուշության հետ կապված մանրամասները կպարզի, լիցքավորված մարտական զենքով հերթապահություն է, ամեն ինչ կարող է պատահել»,- շեշտեց Ռուստամ Գասպարյանը։
Ազատամարտիկն ընդգծեց, որ աղմուկը գուցե պայմանավորված է ապրիլյան սպասվող զարգացումներով, բայց պետք չէ զինծառայողի կյանքի հետ խաղալ։ Ռուստամ Գասպարյանը չի կարծում, որ հենց Վիգեն Սարգսյանն է փիառի համար կոչով դիմել։
«Միայն Ալբերտը չէ նման խնդիրներով, ՊՆ-ն ոչ բոլորին կարող է օգնել, դրա համար Վիգեն Սարգսյանը դիմել է հասարակությանը, որ ովքեր կարողանան օգնեն։ Ամոթ է, հիմա Ադրբեջանում նայում ծիծաղում են»,-շեշտեց ազատամարտիկը։
Նախկին պատգամավորը ընդգծեց, որ բազմաթիվ դեպքեր գիտի, երբ նման զինծառայողների առողջության վերականգնման համար գումար է պետք եղել, իշխանությունները դիմել են որոշ գործարարների՝ հորդորելով գումար փոխանցել։
«Էլի կրկնեմ՝ պաշտպանության նախարարությունը աջակցում է՝ որքան հնարավոր է զենք-զինամթերքի, վառելանյութի բազմաթիվ այլ հարցեր ևս կան, որոնց համար լրացուցիչ գումարներ են պետք»։
Ազատամարտիկը շեշտեց, որ վերջերս են իր ջոկատով վերադարձել դիրքերից, պատրաստվում են կրկին գնալ։
«Ես քաղաքականությամբ տևական ժամանակ է չեմ զբաղվում, պաշտպանության ոլորտում եմ, քաղաքական հարցերի չեմ պատասխանում, միայն կարող եմ ասել՝ հասարակությունը պիտի զգոն լինի, զինվորի թիկունքը պիտի ամուր լինի»։
