Կառավարության վաղվա նիստում կառավարությունը հավանություն կտա «Գյուղատնտեսության պետական աջակցության մասին» օրենքի նախագծի վերաբերյալ կառավարությանն առաջարկության նախագծին։
Ըստ գյուղատնտեսության նախարարության կառավարությունն արդեն իսկ իրականացնում է գյուղատնտեսության ռիսկերի նվազեցման և աջակցման ծրագրեր շուկայական մեխանիզմների կիրառմամբ (հակակարկտային ցանցերի ներդրման նպատակով տրամադրված վարկերի սուբսիդավորման, գյուղատնտեսության ապահովագրության ներդրման (պիլոտային), գյուղատնտեսության ոլորտին տրամադրվող վարկերի սուբսիդավորման, գյուղատնտեսական տեխնիկայի ֆինանսական վարձակալության պետական աջակցության և այլ նպատակային ծրագրեր): Մինչդեռ նախագծով գյուղատնտեսության պետական աջակցության հիմնական շեշտը դրվում է ոչ շուկայական մեխանիզմների վրա և ենթադրում է պետության կողմից որևէ կերպ չսահմանափակված պայմանական պարտավորության ստանձնում, որը բավականին խնդրահարույց է պետական բյուջեի ծախսային մասի պլանավորման տեսանկյունից:
Միաժամանակ, հարկ է հաշվի առնել այն, որ «Եվրասիական տնտեսական միության մասին» պայմանագրի 95րդ հոդվածի 5րդ մասի համաձայն՝ Միության շրջանակներում գյուղատնտեսությանը տրամադրվող պետական աջակցությունը իրականացվում է Պայմանագրի 29րդ հավելվածով սահմանված մոտեցումներին համապատասխան:
Նախագծով եզրակացություն է արվել, որ վերը նշված օրենքի նախագծի ընդունումը չի հանգեցնի ՀՀ պետական բյուջեի եկամուտների նվազեցման:
Միաժամանակ, նշված նախագծով սահմանվող գյուղատնտեսության պետական աջակցության հիմնական ուղղությունները, այլ հավասար պայմաններում, կարող են բերել պետական բյուջեի ծախսերի ավելացման, որի ազդեցության չափը գնահատել հնարավոր չէ:
