Երեկ Մաշտոցի պողոտայում տեղի ունեցած բախումներից հետո, ըստ նախնական տվյալների, շտապօգնության մեքենայով հիվանդանոց է տեղափոխվել 8 ոստիկան, որոնցից 2-ն այժմ գտնվում են «Սուրբ Գրիգոր Լուսավորիչ» բժշկական կենտրոնում։ Ոստիկաններ Գեղամ Խաչատրյանն ու Պետրոս Հայրապետյանը կենտրոն են տեղափոխվել շտապ բուժօգնության բրիգադի ուղեկցությամբ՝ Երրորդ հիվանդանոցից: Հայրապետյանին տրվել է գանգուղեղային տրավմա ախտորոշում, իսկ Խաչատրյանի ոտքի շրջանում առկա է ծակած վերք:
Ինչպես «Առաջին լրատվական»-ին տեղեկացրին առողջապահության նախարարության տեղեկատվության և հասարակայնության հետ կապերի վարչությունից, ոստիկաններից մեկի մոտ ախտորոշվել է ուղեղի ցնցում, մյուսի վնասվածքները ճակատային հատվածում են: Նրանց վիճակն այժմ միջին ծանրության է: Տուժած ոստիկանների կյանքին վտանգ չի սպառնում:
Լուսանկարը՝ Photolure-ի
