Հայաստանի Ագրարագյուղացիական միավորումը կոչ է անում հայ ֆերմերներին խուճապի չմատնվել, քանի որ հայկական կարտոֆիլում կարանտին վիրուսի մասին տեղեկությունն ընդամենը հերյուրանք ու պրովոկացիա է: Նոյեմբերի 5-ին լրագրողների հետ հանդիպմանը Ագրարագյուղացիական միավորման նախագահ Հրաչ Բերբերյանը նշեց, որ ամբողջ աշխարհում այս տարի վատ կարտոֆիլ է:
«Հայ գյուղացու համար անցյալ տարվա կորուստները վերականգնելու շանս է ստեղծված, նա, ով փորձի խոչընդոտել, թշնամի է: Շտապեմ հանգստացնել՝ կարտոֆիլի գինը (մեծածախ) 120 դրամ է և դեռ բարձրանալու է: Վերջին տասը տարում կարտոֆիլի զարգացման գործում մասնավոր ֆերմերների կողմից դրվել է 15 մլն եվրո՝ պարարտանյութերի, նոր տեխնոլոգիաների, տեխնիկայի և այլնի համար, այսինքն՝ մասնավոր սեկտորը, առանց միջնորդության, մասնակցել է ոլորտի զարգացմանը»,- ասաց նա:
Բերբերյանի համոզմամբ՝ Վրաստանից Հայաստան հետ ուղարկված կարտոֆիլի հերթական բեռնաքանակի մասին լուրերը միայն վնասում են հայ գյուղացուն: Նրա ունեցած տվյալներով՝ այս տարի 10 հազար տոննայից ավել կարտոֆիլ է արտահանվել, պարզապես գնորդներ կան, ովքեր ձգտում են էժան կարտոֆիլ ձեռք բերել, որ գերշահույթ ստանան: Բնականաբար, այն որակապես զիջում է, բայց ասել, որ Հայաստանի կարտոֆիլը որակյալ չէ, մեղմ ասած, չի կարելի: Բերբերյանը նշեց, որ ամբողջ աշխարհում կարտոֆիլի գինը բարձր է:
«Այս տարի աշխարհում կարտոֆիլի տարի չէ: Ի փառս մեր աշխատանքի՝ պիտի ասեմ, որ մենք ապահովել ենք կայուն բերք, ունենք ինքնաբավ կարտոֆիլ, որ մեզ կբավականացնի մինչև հաջորդ բերքը, կարող ենք մի փոքր էլ արտահանել: Հայ գյուղացին այս տարի հնարավորություն է ստացել ոտքի կանգնելու, ու տեսեք՝ ինչ են անում: Ասում են՝ կարտոֆիլի քաղցկեղ է: Նայում ենք՝ թաց պտուղ է, ումի՞ց է ձեռք բերել, որտեղի՞ց, հայտնի չէ, բայց Հայաստանի անունն են տալիս, մեր հեռուստաընկերությունն էլ նրանց ջրաղացին ջուր է լցնում»,- ասաց նա:
Բերբերյանը նշեց, որ կարտոֆիլը մեզ մոտ հիմնական արտադրանք է, մարդկանց դա էլ դուր չի գալիս: Այդ ադրբեջանա-թուրքական պրոպագանդայից, նրա խոսքով, օգտվում է արտահանողը. կարտոֆիլի գինը բարձրացավ 30 դրամով, և դա նրանց դուր չեկավ:
Իրազեկ և պաշտպանված սպառող ՀԿ նախագահ Բաբկեն Պիպոյանը նշեց, որ պետությունը ոչ թե պիտի այս ամենը քաղաքականացնի, այլ հսկի ոլորտը: Նա վերահաստատեց Բերբերյանի տեսակետը, որ մենք այսօր կարտոֆիլի իմաստով ինքնաբավ ենք, նաև արտահանում ենք, չենք ներմուծում: «Մենք չենք ուզում, որ մեր երկիր մտնի կարանտին վնասատուն, դրա համար պրոֆեսիոնալ կառավարում է պետք: Եթե ցեցը եկել-մտել է Հայաստանի Հանրապետություն, ուրեմն՝ սահմանին լավ չեն աշխատել: Պետության միջամտության պակաս է սա, ապատեղեկատվության արդյունք, անիմաստ պանիկա»,- ասաց Պիպոյանը: Նա հավելեց, որ պետությունը հստակ քայլեր չի անում, ասենք՝ միջազգային ատյաններում չի բողոքում բարձրացված աղմուկի դեմ:
Լուսանկարը՝ PanARMENIAN Photo-ի
