Արմավիրի մարզպետի խորհրդական Մանուկ Սիմոնյանի սպանության գործով նախաքննության ավարտ է հայտարարվել։ Գործի նյութերը տրամադրվել են կողմերին՝ ծանոթանալու։ Այս մասին «Առաջին լրատվական»-ին հայտնեց Քննչական կոմիտեի նախագահի խորհրդական Սոնա Տռուզյանը։
Նշենք, որ մինչ այս գործով նշանակված էին դատահոգեբուժական փորձաքննություններ, որոնց համաձայն, Տռուզյանի խոսքով, Մանուկ Սիմոնյանի կինը՝ Ռուզաննա Մկրտչյանը, մեղսունակ է ճանաչվել։
Գործի նյութերից շատ բան հայտնի չէ։ Մանուկ Սիմոնյանի եղբայրը՝ Արամ Սիմոնյանը, սակայն, կատարյալ խայտառակություն է որակում եղբոր գործով իրականացվող նախաքննությունը։ Նրա խոսքով՝ երբ գործը գտնվում էր ոստիկանության Արմավիրի բաժնում, կատարվում էին հստակ գործողություններ, հստակ քայլեր, սակայն երբ գործը տեղափոխվեց Երևան՝ Քննչական կոմիտե, «ամեն ինչ խափանվեց»։
«Տեսնես ով է այդ վերին ատյաններից խառնվել գործին, որ մետաղալարերով փաթաթված դին դարձավ պարանով փաթաթված, իսկ յոթ բալ երկրաշարժ տեսած հսկա քարը անհետացավ գործից։ Վերջիվերջո, երեք օր իրավապահ մարմինների քթից բռնած՝ ամառվա շոգին վազացնում էին դաշտերով և նույնիսկ շտրաֆ չմուծեցին, բա որտեղ է նրանց ինքնասիրությունը»,- «Առաջին լրատվական»-ի հետ զրույցում ասաց Արամ Սիմոնյանը։
Նշենք, որ Մանուկ Սիմոնյանի դիակը փնտրտուքներից հետո գտել էին Արմավիրի «Դալարիկի ձոր» կոչվող տարածքում՝ դիակը մետաղալարով կապկպված և գլխին մեծ քար դրված։ Արամ Սիմոնյանի խոսքով, սակայն, հիմա գործում մետաղալարը փոխվել է պարանով, և ոչ մի տեղ խոսք չկա գլխին դրված քարի մասին, որոնք, մեր զրուցակցի խոսքով, էական հանգամանքներ են։ Դրանք փաստում են կատարվածի դիտավորության և մի շարք այլ հանգամանքների մասին։
Մանուկ Սիմոնյանի իրավահաջորդ՝ Արամ Սիմոնյանի փաստաբան Լիլյա Մնոյանը անգամ տեղյակ էլ չէր, որ գործով նախաքննության ավարտ է հայտարարվել։ Մեր բոլոր հարցերին վերջինս պատասխանում էր, որ նախաքննական գաղտնիություն գոյություն ուն: «Գործի մասին ոչ մի տեղեկություն չունեմ, չգիտեմ՝ նախաքննությունը որ փուլում է։ Բայց հիմա, այս փուլում, երբ նախաքննություն է ընթանում, նպատակահարմար չէ»,- ասաց փաստաբանը։
Մեր դիտարկմանը, թե կարո՞ղ է ասել՝ իրեն բավարարո՞ւմ է նախաքննության ընթացքը, պատասխանեց. «Եթե չբավարարեր, միջնորդություն կներկայացնեինք, իսկ եթե չենք ներկայացնում, ուրեմն բավարարում է մեզ»։
Արամ Սիմոնյանը նշեց, որ հիմա էլ վստահ է՝ Մանուկ Սիմոնյանին սպանել է ոչ թե կինը՝ Ռուզաննա Մկրտչյանը, այլ նրա որդին՝ Նորիկ Սիմոնյանը, սակայն մայրը հանցագործությունը իր վրա է վերցրել, որպեսզի երիտասարդ որդու կյանքը չխորտակվի։ «Ռուզանը տանն է եղել, տեսել է, բայց Նորիկն է սպանել։ Սակայն հորն ուրացողին պարտակելը, նրան օժանդակելը ոչնչով չի տարբերվում հայրասպանությունից։ Մեկ է՝ ճշմարտությունը հաղթելու է, ես հասնելու եմ իմ նպատակին»,- ասաց եղբայրը։
Ռուզաննա Մկրտչյանի պաշտպան Նաիրա Պետրոսյանը «Առաջին լրատվական»-ի հետ զրույցում ասաց, որ իրենք դժգոհ են դատահոգեբուժական փորձաքննության արդյունքներից, և որ Ռուզաննա Մկրտչյանը միանշանակ պետք է անմեղսունակ ճանաչվեր։ «Մենք արդեն բողոք ենք ներկայացրել կրկնակի փորձաքննություն նշանակելու։ Ռուզաննան միանշանակ անմեղսունակ պետք է ճանաչվի, քանի որ նա տարիներ շարունակ խոշտանգման է ենթարկվել տուժողի կողմից։ Հակաբարոյական վարքագծի պատճառով ինքը գտնվել է աֆեկտի վիճակում, արարքը կատարել է աֆեկտի վիճակում։ Տարօրինակ է, որ փորձագետը դրան որևէ անդրադարձ չի կատարել։ Դրա համար էլ մենք վիճարկում ենք փորձաքննության արդյունքները»,- ասաց Պետրոսյանը։
Ինչ վերաբերում է գործի նյութերի այլ մանրամասներին, ապա տիկին Պետրոսյանն ասաց, որ դեռ ծանոթանում է։ Առայժմ չի հասցրել ամբողջական ծանոթանալ դրանց։
