Հայրենադարձության ծրագիր մշակվում է, այդ ծրագիրը կա, որն այս տարի երևի չհասցրեցին ներկայացնել, հաջորդ տարի անպայման կներկայացնեն։ Այդ մասին «Առաջին լրատվական»-ի հետ զրույցում նշել է ժողովրդագրագետ Արտակ Մարկոսյանը։
«Որքան ես տեղյակ եմ, ՄԱԿ-ի բնակչության հիմնադրամի փորձագետներն են ծրագիրը կազմել՝ աշխատանքի և սոցիալական հարցերի նախարարության հետ համատեղ։ Խնդիրն այն է, որ ժողովրդագրական վիճակի բարելավման համար այս տարի ոչ մի միջոց նախատեսված չէ բյուջեում։ Պետք է պարզել, թե կառավարության ծրագիրն ինչպես է ազդում արտագաղթի տեմպերի վրա։ Բնականաբար, եթե արտագաղթը նվազում է, մարդիկ մնում են երկրում, նշանակում է՝ կառավարությունը լավ է աշխատում։ Այո, մենք ունենք տնտեսական աճ, սակայն, չգիտես ինչու, դա այնքան էլ չի ազդել մշտական մեկնողների վրա»,- ասաց ժողովրդագրագետը։
Նրա խոսքերով՝ այս տարի ընդհանուր արտագաղթը, միգրացիոն սալդոն նվազել է 2016-ի համեմատ, բայց, ցավոք սրտի, մեծանում է մշտական գնացողների թիվը. «Նրանց մեծ մասը գնում է Ռուսաստան։ Վերջերս ԵՄ-ի հետ համաձայնագիր ստորագրվեց, և նշվում է, որ եթե մենք իրականացնենք այն բոլոր բարեփոխումները, որ պարտավորվել ենք, միայն դրանից հետո կարող է խոսվել վիզային ռեժիմը հանելու մասին՝ 2020 թվականից հետո։ Ես չեմ կարծում, որ դա մեծ սպառնալիք կլինի արտագաղթի տեմպերի առումով, իրական սպառնալիքը դեպի Ռուսաստան արտագաղթն է։ Ես չեմ կարծում, որ այդպիսի մեծ ալիք կլինի դեպի ԵՄ երկրներ»։
Ամբողջությամբ՝ տեսանյութում:
