Սերժ Սարգսյանը իր վերջին հարցազրույցում, անդրադառնալով հեռացող պաշտոնյաներին, ասել է, որ շատ խոր հարգանք ունի բոլոր այն մարդկանց նկատմամբ, ովքեր երբևէ ծառայել են Հայաստանի Հանրապետությանը, բայց սա չի նշանակում, որ այդ մարդիկ անփոխարինելի են, կամ` այդ մարդիկ մշտապես պետք է լինեն ծառայության մեջ. «Իմ ասածը չի նշանակում, որ ովքեր գնացել են, գնացել են հավերժ, հավիտյան: Տրամաբանությունը հետևյալն է՝ նախ ցանկացած կառույց, այդ թվում նաև պետական կառույցները պետք է թարմացվեն, լճացումն անթույլատրելի է: Ես կարող եմ բերել օրինակներ և հավերժ գնացածի, և հետ վերադարձի, ուղղակի չգիտեմ` հարմար է, թե չէ։ Օրինակ՝ ես իմ մասով կարող եմ ասել՝ նախագահի աշխատակազմը ղեկավարում է Արմեն Գևորգյանը, որը տևական ժամանակ աշխատում էր պետական կառույցներում, ինչ-որ մի պահ գնաց այլ աշխատանքի, բայց նորից հետ վերադարձավ ու հիմա փայլուն աշխատում է։ Այնպես որ, մոտեցումը եղել է և մնում է անհատական»։
ԱԺ ՀՀԿ խմբակցության նախին պատգամավոր Առաքել Մովսիսյանը (Շմայս), որը խորհրդարանական ընտրություններին առաջադրվել էր ՀՀԿ ռեյտինգային ընտրակարգով, դուրս մնաց ընտրապայքարից: «Առաջին լրատվական»-ը նրանից հետաքրքրվել է՝ հնարավո՞ր է Սերժ Սարգսյանը նրան հետ կանչի և նշանակի պաշտոնում: Ի պատասխան Մովսիսյանը նշել է. «Կարող է մեկ քայլ առաջ կամ հետ անենք, մի րոպե հետո ընկնենք մեռնենք: Բոլորիս է դա վերաբերվում: Այնպես որ, կյանքում ոչ մի բան անխուսափելի չէ, կյանքում ճանապարհ եթե անցնում ես, պետք է ոտքերիդ տակ նայես, նոր անցնես, բայց կարող է սխալ քայլ անես, ընկնես մեռնես, ամեն ինչ էլ հնարավոր է: Բայց նախագահի խոսակցությունները, ասածները ես երբևիցե ի վիճակի չեմ քննարկման ենթակա դարձնելու»։
Ինչ վերաբերում է՝ եթե առաջարկեն քաղաքականություն վերադառնալ, արդյոք կվերադառնա՞, Առաքել Մովսիսյանը ասել է. «Բայց ես չեմ էլ գնացել, ո՛չ քաղաքականությունից եմ դուրս եկել, ո՛չ էլ հետ եմ մնում որևէ մի բանից»,-ասաց նա՝ հավելելով, որ շարունակում է հետևել քաղաքական գործընթացներին:
Իսկ թե ինչ է մտածում 2018-ի ապրիլից հետո քաղաքական զարգացումների մասին, արդյոք ո՞ւմ է տեսնում վարչապետի պաշտոնում, Առաքել Մովսիսյանն ասել է. «Մոտիկություն ենք անում, որպես հանրապետության վարչապետ՝ գնահատում ենք, բայց քանի որ մեր երկիրն ունի անվտանգության խնդիր, այդ կարգավիճակում միայն տեսնում եմ մեր հանրապետության ներկայիս նախագահին»։
