Սերժ Սարգսյանին վարչապետի պաշտոնում տեսնելու հարցում ոչ մի սցենար չկա։ Այդ մասին «Առաջին լրատվական»-ի հետ զրույցում նշել է ՀՀԿ խմբակցության պատգամավոր Միհրան Հակոբյանը։ Նրա խոսքերով՝ 2018 թվականի ապրիլին իրենք կանդրադառնան, թե ով կլինի վարչապետի պաշտոնի համար ՀՀԿ-ի թեկնածուն և այդ քննարկումների շրջանում նախագահ Սերժ Սարգսյանի կարծիքը որոշիչ կլինի։
«Հաշվի առնելով ստեղծված իրավիճակը, մեր շրջակա միջավայրը, մեր մարտահրավերները, խորքային գիտելիքները, թերևս Սերժ Սարգսյանը մեր երկրի ամենափորձառու պետական գործիչն է, որի թեկնածությունը վարչապետի պաշտոնի համար մենք կքննարկենք, եթե նախագահը հարմար գտնի։ Բայց սցենար, որպես այդպիսին, գոյություն չունի։ Մարդիկ իրենց կարծիքն են հայտնում»,- ասաց նա։
Դիտարկմանը, թե այդ ինչպե՞ս ստացվեց, որ բոլոր հանրապետականները մեկ մարդու նման նույն կարծիքն են հայտնում, սա տպավորություն չի՞ ստեղծում, որ սցենար է գործում, ՀՀԿ-ական պատգամավորն ասաց. «Այստեղ որևիցե տարօրինակ դրվագ չեմ կարող գտնել և չեմ էլ փնտրում, որովհետև նախագահ Սերժ Սարգսյանը ՀՀԿ-ի բազմամյա ղեկավարն է և նրա առաջնորդությամբ ՀՀԿ-ն լրջագույն հաջողություններ է գրանցել։ Տարօրինակ ոչ մի բան չկա, որ կուսակցականները ցանկություն են հայտնում տեսնել իրենց առաջնորդի աշխատանքի շարունակությունը որպես երկրի ղեկավար»։
Հարցին, թե տարօրինակ չէ՞, որ ՀՀԿ-ն այդքան մեծ կուսակցություն է, բազմաթիվ անդամներ ունի, սակայն Սերժ Սարգսյանին այլընտրանք չեն տեսնում, սա քաղաքական ճգնաժամի մասին չի՞ խոսում, Միհրան Հակոբյանը պատասխանեց.
«Ոչ, չի խոսում, այլընտրանքներ միշտ կան, անփոխարինելի մարդիկ չկան, բայց դա քննարկման ու վիճելու թեմա էլ չէ, որովհետև պարզ է, որ Սերժ Սարգսյանը երկրի կառավարման գործում ամենամեծ փորձն ու գիտելիքներն ունի։ Հետևաբար, կուսակցականներն իրենց կարծիքն են հայտնում, որ նա ամենափորձառու, ամենաիմաստուն գործիչն է մեր կուսակցությունում և հանրապետությունում, ուստի ճաշակի ու նախընտրությունների մասին խոսելու, քննադատելու կամ այլ տեսանկյունից խնդիրները դիտարկելու պատճառ ես չեմ տեսնում»։
Հիշեցմանը, որ 2015-ին Սերժ Սարգսյանը հայտարարել էր, որ սահմանադրական փոփոխություններից հետո չի հավակնելու վարչապետի պաշտոնին, և եթե հիմա վարչապետ դառնա, կստացվի, որ հրաժարվում է իր խոսքից, Միհրան Հակոբյանն ասաց. «Պետական կառավարումը և մեր ժողովրդի ճակատագիրը երբեմն ենթադրում են իրավիճակի փոփոխության հետ կապված որոշումներ։ Անձամբ ես, որպես ՀՀԿ խորհրդի անդամ, 11 տարվա կուսակցական ու պատգամավոր, չեմ խորշում ասել, որ եթե ժամանակը գա և մենք քննարկելու հնարավորություն ունենանք, ես չունեմ այդ բարդույթը՝ խնդրելու Սերժ Սարգսյանին, որ նա ստանձնի վարչապետի պաշտոնը։ Այստեղ որոշիչ է, թե ինչ կորոշի Սերժ Սարգսյանը։ Նա կլինի այն պաշտոնում, որտեղ ինքը հարմար կգտնի և մենք կաջակցենք նրան այդ որոշման մեջ»։
Ամբողջությամբ՝ տեսանյութում։