Քաղաքական վերլուծաբան Արմեն Բաղդասարյանը քիչ հավանական է համարում, որ «Ելք» և «Ծառուկյան» դաշինքները հաջող կբանակցեն և նախագահի միասնական թեկնածու կունենան։ «Առաջին լրատվական»-ի հետ զրույցում քաղաքական վերլուծաբանն ասաց, որ խնդիրը Արտակ Զեյնալյանի թեկնածության հետ կապված չէ։
«Հասկանալի է, որ, միևնույն է, խորհրդարանում բացարձակ մեծամասնություն ունի ՀՀԿ-ն, միայն առաջին հայացքից է, որ նախագահի պաշտոնը ձևական է թվում, իրականում այդպես չէ, ամեն դեպքում լուրջ պաշտոն է, որտեղ լուրջ լծակներ կան, առավել ևս, երբ երկրում ստեղծվում է ֆորս-մաժորային իրավիճակ, երբ, օրինակ, խնդիրներ են առաջանում կառավարության անվստահության հետ կապված, միանգամից նախագահը դառնում է առանցքային ֆիգուր, իսկ եթե ամեն ինչ նորմալ է, կայուն մեծամասնություն կա, նախագահը դառնում է երկրոդական ֆիգուր։ Ամեն դեպքում նախագահի պաշտոնը շատ կարևոր է, ամեն դեպքում թույլ չեն տա, որ այնտեղ ընդդիմության թեկնածուն հաղթի։ Սա բոլորը գիտակցում են, հետևաբար ընդդիմության միասնական թեկնածուն կլինի անիմաստ, այսինքն՝ ի սկզբանե պարտության դատապարտված «Ծառուկյան» դաշինքն էլ ինչու պետք է ցանկանա մտնել մի գործընթացի մեջ, որն ի սկզբանե դատապարտաված է, խնդիրը Արտակ Զեյնալյանի անձը չէ, նա գուցե ամենահարմար թեկնածուն է, խնդիրն այն է, որ սա անհեռանկարային գործընթաց է, որը հաջողության որևէ շանս չունի»։
Քաղաքական վերլուծաբանի խոսքերով՝ «Ելք»-ի համար պարզապես հարմար առիթ է ցույց տալու, որ իրենք պայքարում են և ոչ իրենց մեղքով հաջողության չեն հասնում։
Ըստ նրա՝ այսօր լուրջ խնդիր է դարձել այն, որ Հայաստանում իշխանափոխություն արդեն հնարավոր է միայն ահաբեկչության ձևով, ուստի պատահական չէ, որ խմբավորումներ են բացահայտվում։
«Ժողովրդավարական երկրում դա անիմաստ է, ահաբեկչության միջոցով անիմաստ է իշխանության հասնելը, որովհետև ինստիտուտներ կան, իսկ եթե ամեն ինչ հենված է մեկ անձի վրա՝ ահաբեկչության վտանգը միշտ կա։ Հայաստանում ամեն ինչը մի անձի վրա է հիմնված, նույնը եղել է 1999թ-ին, երբ որ ամեն ինչ Վազգեն Սարգսյանի վրա էր, և ունեցանք Հոկտեմբերի 27-ը, եթե ամեն ինչ մեկ անձի վրա կենտրոնացված չլիներ, այդ ահաբեկչությունը չէր լինի, անիմաստ կլիներ, պրոբլեմը սա է։ Բա եթե ուրիշ ելք չեն թողնում, էդպիսի փորձեր էլ կլինեն ու անընդհատ»,- ընդգծեց Արմեն Բաղդասարյանը։
Մանրամասները՝ տեսանյութում։
