«Մեր նորագույն պատմության մեջ բազմաթիվ դեպքեր են եղել, երբ մարդիկ փորձել են հավաստիացնել, որ այս կամ այն պաշտոնատար անձը կապ ունի հանցավոր գործունեության հետ։ Եղել են դեպքեր, որ իսկապես կապ ունեցել են, բայց իրենց մասով որևէ բան՝ նախաքննության ու դատաքննության ժամանակ ի հայտ չի եկել։ Հիմա կանխավ ասել, որ Վահան Շիրխանյանի ու Արթուր Վարդանյանի զրույցը համապատասխանում է իրականությանը՝ դժվար է»,- «Առաջին լրատվական»-ի հետ զրույցում ասաց Արցախի նախագահի խորհրդական, «Ազգային անվտանգություն» կուսակցության նախագահ Գառնիկ Իսագուլյանը։
Մեր զրուցակիցը նշում է, որ եթե անգամ ձայնագրությունը հավաստի է, դա դեռ հիմք չէ մտածել, որ առկա զրույցը 100 տոկոսվ համապատասխանում է իրականությանը. «Չի բացառվում, որ Վահան Շիրխանյանը, որպեսզի կարողանա մարդկանց դեպի իրենց թեքել կամ նրանց գործունեությունը ոգևորելու համար ուղղակի խոսեր Սեյրան Օհանյանի մասին»,- ընդգծեց Իսագուլյանը։
Մեր այն դիտարկմանը, որ Սեյրան Օհանյանը պետք է արձագանքի իրեն ուղղված մեղադրանքներին և պարզաբանի իրավիճակը, Գառնիկ Իսագուլյանն արձագանքեց. «Թե ինչու Սեյրան Օհանյանը չի պատասխանում՝ բացառապես իր անձնական գործն է։ Ես չեմ կարծում, որ իրենք նոր են իմացել, որ նման ձայնագրություն կա, կամ որ դա ի հայտ է եկել բացառապես դատարանում հրապարակման ժամանակ։ Գուցե որոշակի խորհրդակցություններից հետո մարդիկ եզրակացրել և որոշել են, որ եթե դատաքննության այս փուլում հրապարակվի ձայնագրությունը, իրենք ինչ մարտավարություն կորդեգրեն։ Այնպես որ, դա բացառապես Սեյրան Օհանյանի որոշելու խնդիրն է։ Վստահ եմ՝ ինչ-որ պահի արձագանք լինելու է։ Չի կարող մնալ անարձագանք, որովհետև ամբողջ գործողության գագաթնակետը պետք է լիներ պաշտպանության նախարարի որոշումը։ Ընդ որում, այդ երկխոսության մեջ բավականին ծանր հանցագործության մասին է խոսք գնում՝ կապված նախագահի հետ»։
Հարցազրույցն ամբողջությամբ՝ տեսանյութում։
