Երևանի կենդանաբանական այգին արդեն ունի կենդանիների ժամանակավոր պահման կարանտինային կենտրոն: Այցելուները կարող են նաև արջերին և գայլերին անվտանգ հեռավորությունից հետևել նոր կառուցված դիտարկման աշտարակի շնորհիվ: Այգին դառնալու է ժամանակակից չափանիշներին համապատասխան՝ բնապահպանական, կրթամշակութային ու տեղական ֆաունայի պահպանման, վերարտադրման կենտրոն:
Երևանի քաղաքապետարանից տեղեկացնում են՝ վերակառուցման աշխատանքները կավարտվեն տարեվերջին:
«Կենդանաբանական այգու վերակառուցման և բարեկարգման աշխատանքներն անընդհատ են և շարունակական: Այս փուլում նախատեսվածը ավարտական փուլում է: Կարանտինային կենտրոնի կառուցումն արդեն ավարտվել է: Կենտրոնը կենդանաբանական այգու գործունեության հիմնաքարն է, որը նախատեսված է նոր ձեռք բերված կենդանիների նախապահման համար: Կարանտինի ընթացքում իրականացվում են բուժական անհրաժեշտ զննումներ, ցուցաբերվում համապատասխան բուժօգնություն, կանխարգելվում հնարավոր հիվանդությունների տարածումը: Սա տեղական ու միջազգային օրենսդրության պահանջն է»,-տեղեկացրեցին քաղաքապետարանից:
Կարանտինային կենտրոն են տեղափոխվում նաև հատուկ ուշադրություն պահանջող, վարքագծային շեղումներ, առողջական խնդիրներ ունեցող կենդանիները՝ անհապաղ արձագանքման ու համապատասխան բուժում ստանալու նպատակով: Առանց կարանտինային կայանի հնարավոր չէ պատկերացնել որևէ կենդանաբանական այգու գործունեություն:
Արջերի և գայլերի ազատավանդակի, աֆրիկյան առյուծների ազատավանդակի ներքին ու արտաքին հարդարման աշխատանքները ևս ավարտված են: Արջերի և գայլերի ազատավանդակի տարածքն ընդլայնվել է 5 անգամ: Նախկին 1000 քմ-ի փոխարեն տարածքը կազմում է 5000 քմ: Ազատավանդակում կառուցվել են ներքին ու արտաքին հատվածները: Այժմ ավարտական փուլում են ձմեռանոցի կառուցման ու արտաքին հարդարման աշխատանքներ: Քայլուղիներ ու դիտարկման աշտարակ է կառուցվել արջերի ու գայլերի ազատավանդակում, ընդլայնվել են նաև ձիարշավարանից առյուծների ազատավանդակ տանող քայլուղիները:
Հարցին, թե առաջիկայում կենդանաբանական այգում նոր կենդանիներով համալրում սպասվու՞մ է, քաղաքապետարանից պատասխանեցին.
«Կենդանատեսակի ընտրությունը կախված է մի շարք գործոններից, որոնցից ամենակարևորը տվյալ կենդանու կենսաբանական առանձնահատկություններին համապատասխան ազատավանդակի առկայությունն է: Այս կամ այն տեսակն ընտրելիս հարկավոր է ունենալ համապատասխան պահման տարածք, ապահովել անհրաժեշտ սննդակարգ ու խնամք: Կենդանաբանական այգու զարգացման այժմյան տեսլականով առաջնահերթությունը տրվել է խոշոր կաթնասունների (գիշատիչների) պահման պայմանների բարելավմանն, իսկ այլ կենդանիների համալրումը կախված է այգու զարգացման հետագա փուլերում նախատեսված փոփոխություններից»:
Կենդանաբանական այգու վերակառուցման ծրագիրը շարունակական է, ձգտումն է՝ ամբողջությամբ համապատասխանեցնել միջազգային չափանիշներին, ուստի առկա են նոր այլ մոտեցումներ և նախագծեր: Ծրագրի ավարտը նախատեսվում է տարեվերջին: Այգին դառնալու է ժամանակակից չափանիշներին համապատասխան՝ բնապահպանական, կրթամշակութային ու տեղական ֆաունայի պահպանման վերարտադրման կենտրոն:
