Թեև պապիլոմա վիրուսի դեմ պատվաստումները շուտով կմեկնարկեն, սակայն դրա հանդեպ դեռևս խոր անվստահություն կա։ Անվստահության աստիճանի նվազեցմանը չօգնեց նաև բժիշկների կողմից իրենց երեխաներին հրապարակավ պատվաստելը։ Սակայն ինչպես երևում է, այս փաստը առանձնապես չի մտահոգում նախարարությանը։ Գարդասիլ տեսակի պատվաստանյութի անվտանգության և հետագայում որևէ հետևանք չառաջացնելու հարցում առողջապահության նախարարությունը չունենալով այլ հիմնավորումներ, անցել է բժիշկներին վարկաբեկելու գործին։ Հայտնի է, որ արգանդի պարանոցի քաղցկեղը կանխարգելելու համար նախատեսված այս պատվաստումներին դեմ են արտահայտվում նաև օնկոլոգ-գինեկոլոգները՝ նշելով, որ վիրուսի պապիլոմա տեսակը հեշտ հայտաբերվող է և պատվաստման անհրաժեշտություն այս դեպքում չկա։
Օրերս ՀՀ առողջապահության նախարարության մայրական վերարտադրողական առողջության պահպանման բաժնի պետ Գայանե Ավագյանը կարծիք էր հայտնել, որ այս հարցում շահերի բախում կա, քանի որ ինչքան շատ լինեն օնկոհիվանդները, այնքան իրենք շատ գործ կունենան։ Թեև Գայանե Ավագյանի այս կարծիքը մեկ օնկոլոգի մասին էր, որը դեմ է պապիլոմա վիրուսի դեմ պատվաստումներին, սակայն այս հայտարարությունը վրդովվեցրել է բոլոր օնկոլոգներին։ Որքան էլ զավեշտալի է, այս կարծիքին է ոչ միայն Գայանե Ավագյանը, այլև նախարարության շատ պաշտոնյաներ՝ առողջապահության նախարար Լևոն Ալթունյանի գլխավորությամբ։ Նա տարբեր շրջանակներում չի էլ թաքցնում և արտահատվում է, որ բժիշկները պապիլոմա վիրուսի դեմ պատվաստումներին դեմ են արտահայտվում հենց Ավագյանի նշած պատճառով։ «Չեն ուզում կլիենտ կորցնեն»,- հայտարարում է նախարարը։
Տիկին Ավագյանի և նախարարի այս կարծիք-հայտարարությունները մեծ իրարանցում, աղմուկ և վրդովմունք է առաջացրել բժիշկների շրջանում։ Վերջիններս պատրաստվում են նամակով դիմել վարչապետին և Սերժ Սարգսյանին՝ պահանջելով պարտավորեցնել նախարարին՝ իր ծրագրերը առաջ տանել, այլ եղանակ գտնել և չվարկաբեկել բժիշկներին, քանի որ բժիշկը ոչ մի պարագայում չի կարող շահագրգիռ լինել, որ քաղցկեղով հիվանդ մարդիկ շատ լինեն։ Եթե նախարարը հիմնավորումներ ունի, թող հիմնավորի, որ իր ծրագիրը ճիշտ է, բայց ոչ մի պարագայում չվարկաբեկի իրենց, քանի որ եթե հասարակության մեջ տարածվի քարոզչությունը, թե բժիշկները շահագրգիռ են, որ քաղցկեղով հիվանդ մարդիկ շատ լինեն, ապա ոչ մի պարագայում այլևս չեն վստահի բժիշկներին։ «Դա խայտառակություն է, երբ բժիշկների հանդեպ անվստահություն է քարոզում հենց առողջապահության նախարարությունը»,- պնդում են բժիշկները։
Ուշագրավ է, որ առողջապահության նախարար Լևոն Ալթունյանը մի կողմից օրենք է մշակում և խստացնում է քաղաքացիների կողմից բժիշկների նկատմամբ կիրառվող բռնությունը, բայց մյուս կողմից, փաստորեն, նախարարը լծվել է բժիշկներին վարկաբեկելու գործին, միայն թե իր ծրագիրը առաջ գնա։ Բժիշկները պատրաստվում են վարչապետից, Սերժ Սարգսյանից պահանջել, որպեսզի օրենսդրորեն մի նորմ էլ ամրագրվի, որով բժիշկները կկարողանան պաշտպանվել նախարարից։
