Ռուսաստանում միգրանտների նկատմամբ քաղաքականության խստացումը շարունակվում է: Օրերս «Միացյալ Ռուսաստան» կուսակցության առաջնային բաժինների ղեկավարների հետ հանդիպման ժամանակ ՌԴ նախագահ Վլադիմիր Պուտինն ասել էր, որ գուցե լավ լինի, եթե միգրանտները չաշխատեն առևտրի ոլորտում: Ավելին՝ Պուտինը դիմել է կառավարությանը՝ հորդորելով որոշել այն ոլորտները, որոնցում միգրանտները չպետք է աշխատեն: Նրա խոսքով՝ առևտրի ոլորտում աշխատող միգրանտներին բարդ չէ փոխարինել ՌԴ քաղաքացիներով, իսկ շինարարության և մի շարք այլ ոլորտներում միգրանտական ուժ անհրաժեշտ է:
ՌԴ Ներքին գործերի նախարարության տրամադրած տվյալների համաձայն ՌԴ-ում ապրող միգրանտների 80 %-ը չունի աշխատանքային իրավունք:
Ռուսաստանի «Հակակոռուպցիոն» հանձնաժողովի նախագահի խորհրդական, անկախ իրավապաշտպան Արբակ Խաչատրյանն «Առաջին լրատվական»-ի հետ զրույցում ասաց, որ ՌԴ նախագահի ելույթները և նման կոչերը հետագայում հարմարեցնում են օրենքին: Ուստի, նրա խոսքով, ՌԴ-ում կհասնեն նրան, որ ոլորտում առևտրի ոլորտում չաշխատեն միգրանտներ: «Բայց այդ համակարգի ջարդումը շատ բարդ գործընթաց կլինի, քանի որ այն մշակվել է տասնյակ տարիներ առաջ:
Նման փոփոխություններն ահռելի հարված կտան նաև Հյուսիսային Կովկասի երկրներին՝ ՌԴ հարաբերությունները վատթարացնելով այդ երկրների հետ: Լարվածություն կլինի, ահաբեկչությունը շարունակվում է, որը վտանգի տակ կարող է դնել միգրանտների անվտանգությունը:
Ռուսներն ասում են, որ իրենք կարող են այդ ոլորտում աշխատել, գոնե ռուս քաղաքացիները, իսկ միգրանտներն ավելի ծանր տեղերում կարող են աշխատել, եկողներն ավելի ցածր և ծանր աշխատանք պետք է անեն, քան առևտուրն է»,- նման տեսակետ հայտնեց Արբակ Խաչատրյանը՝ շարունակելով, որ ատելությունն այն աստիճանի է հասել, որ ոչ մի օրենք չի գործելու: Այդ վերաբերմունքը ժողովրդի արյան մեջ է և ղեկավարում է ամբոխին, որն իր ձեռքն է վերցնում լծակները:
Ըստ Արբակ Խաչատրյանի՝ այս նոր կարգավորումները վերաբերելու են նրանց, ովքեր աշխատելու իրավունք չունեն, իսկ աշխատանքային իրավունքն այնքան բարդ է օրենքով ընդունվում, շատ քիչ քանակությամբ է տրվում, որ կա՛մ պետք է ավելացվի, կա՛մ ռեգիոնալ կարգավորում ստանա, քանի որ եղած քվոտաներով անհնար է աշխատուժի պակասը լրացնել, քանի որ ՌԴ-ում աշխատուժն ահավոր քիչ է:
«Այսինքն՝ բոլոր միգրանտները երեք ամսից ավելի չեն կարողանա բնակվել ՌԴ-ում, նրանք պետք է դուրս գան երկրից վիզային ռեժիմով կամ առանց վիզայի, բայց աշխատանքի իրավունք էլ չեն ունենա»,- ասաց Արբակ Խաչատրյանը:
