Վրաստանի կառավարությունը հավատարիմ է ընտրած արտաքին կուրսին և չի շեղվի եվրոպական և եվրատլանտյան ուղուց: Ինչպես հաղորդում է «Նովոստի Գրուզիա»-ն, այս մասին հայտարարել է Վրաստանի ԱԳՆ-ը՝ մեկնաբանելով ԱՊՀ պետությունների ղեկավարների խորհրդի նիստին արված Բելառուսի նախագահ Ալեքսանդր Լուկաշենկոյի հայտարարությունը :
Հիշեցնենք, որ Լուկաշենկոն հայտարարել է, որ կցանկանար, որպեսզի Վրաստանը վերադառնար ԱՊՀ կազմ:
«Հավանաբար Լուկաշենկոն հայտարարել է այդ մասին՝ ելնելով նրանից, որ Մինսկում անցկացվում է ԱՊՀ պետությունների ղեկավարների խորհրդի նիստ: Իրականում մեր դիրքորոշումն անփոփոխ է, մեր արտաքին կուրսը եվրոպական և եվրատլանտյան ինտեգրումն է: Դա Վրաստանի ժողովրդի ընտրությունն է, և երկրի կառավարությունը հակված է այդ կուրսին»,- ասել է ԱԳՆ-ի ներկայացուցիչը:
Ավելի վաղ Վրաստանի վարչապետ Բիձինա Իվանիշվիլին հայտարարել էր, որ Վրաստանը չի դիտարկում ԱՊՀ վերադառնալու հարցը, սակայն մտադիր է խորացնել հարաբերությունները Համագործակցության անդամ երկրների հետ: