Հայաստանի արտաքին գործերի նախարար Էդվարդ Նալբանդյանը նոյեմբերի 17-ին հանդիպել է պաշտոնական այցով Երևան ժամանած Նիդերլանդների Սենատի նախագահ Անկի Բրուկերս-Կնոլի հետ։ Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Ողջունելով հյուրին՝ նախարար Նալբանդյանը նշեց, որ քառորդդարյա դիվանագիտական հարաբերությունների պատմության ընթացքում սա Նիդերլանդների խորհրդարանի ղեկավարի առաջին այցն է Հայաստան, և հույս հայտնեց, որ այն նոր խթան կհաղորդի երկկողմ հարաբերություններին։
Նիդերլանդների Թագավորության Սենատի նախագահ Անկի Բրուկերս-Քնոլը նշեց, որ մեծ հաճույքով է այցելում Երևան ու կարևորեց Հայաստանի դերակատարությունը որպես կամուրջ Արևելքի եւ Արևմուտքի միջև:
Զրուցակիցները բարձր գնահատեցին խորհրդարանական դիվանագիտության դերը միջպետական համագործակցության և մարդկանց միջև շփումների խթնաման գործում։
Էդվարդ Նալբանդյանը և Անկի Բրուկերս-Կնոլը կարևորեցին երկու երկրների միջև իրավապայմանագրային դաշտի ընդլայնումը։
Հանդիպմանը մտքեր փոխանակվեցին երկկողմ առևտրատնտեսական հարաբերությունների ընդլայնման ուղիների շուրջ: Այս համատեքստում նախարար Նալբանդյանը գոհունակությամբ հիշատակեց, որ ԵՄ երկրների շարքում Նիդերլանդները հանդիսանում է Հայաստանի կարևոր առևտրատնտեսական գործընկերներից մեկը։
Էդվարդ Նալբանդյանը և Անկի Բրուկերս-Կնոլը մտքեր փոխանակեցին հաջորդ շաբաթ Բրյուսելում կայանալիք Արևելյան գործընկերության գագաթաժողովի նախապատրաստական աշխատանքների վերաբերյալ։
ԱԳ նախարարն ու Սենատի նախագահն անդրադարձան միջազգային և տարածաշրջանային օրակարգի մի շարք հարցերի:
Էդվարդ Նալբանդյանը Նիդեռլանդների Սենատի ղեկավարին ներկայացրեց Լեռնային Ղարաբաղի հիմնախնդրի խաղաղ կարգավորման առաջմղման ուղղությամբ Հայաստանի և ԵԱՀԿ Մինսկի խմբի համանախագահ երկրների կողմից գործադրվող համատեղ ջանքերը։ Զրուցակիցները համակարծիք էին, որ ղարաբաղյան հիմնախնդրի խաղաղ բանակցային կարգավորմանն այլընտրանք չկա»:
