ՀՀ ոստիկանության կրթահամալիրում նոյեմբերի 15-16-ն անցկացվել է սեմինար՝ «Ընտանեկան բռնության դեմ պայքար» թեմայով։ Այս մասին տեղեկացնում է ՀՀ ոստիկանության պաշտոնական կայքը։
Հաղորդագրության մեջ նաև նշված է. «Սեմինարը, որին մասնակցում էին նաև Մեծ Բրիտանիայից ժամանած փորձագետներ, կազմակերպվել էր Հայաստանի Հանրապետության ոստիկանության և Զինված ուժերի ժողովրդավարական վերահսկողության Ժնևի կենտրոնի համատեղ ուժերով։
Ողջունելով մասնակիցներին՝ ոստիկանության կրթահամալիրի պետ, ոստիկանության գեներալ-լեյտենանտ Հովհաննես Վարյանը կարևորեց ընտանեկան բռնության դեմ պայքարին նվիրված դասընթացների նշանակությունը՝ նշելով, որ դա ոլորտում գործող միջազգային փորձին ծանոթանալու հնարավորություն է։
Երկօրյա սեմինարի ընթացքում բրիտանացի փորձագետները ներկայացրին ընտանեկան բռնության դեմ պայքարի ուղղությամբ եվրոպական երկրների փորձը, օրենսդրությունը և իրականացվող աշխատանքները։
Սեմինարն անցավ առարկայական քննարկումների մթնոլորտում»։
