«Բավականին յուրօրինակ երևույթ է, որ ԵԱՏՄ անդամ երկիրը քաղաքական համաձայնագիր է ստորագրում այդ կառույցի գլխավոր մրցակցի հետ։ Դա որոշակի քաղաքական ֆոն է ստեղծում, տարբեր ուժային կենտրոններին ազդակ է, որ Հայաստանը որոշակիորեն պահպանում է կոմպլիմենտար քաղաքականությունը»,- «Առաջին լրատվական»-ի հետ զրույցում նման տեսակետ հայտնեց The National Interest, Forbes, The Hill, American Thinker պարբերականների փորձագետ Արեգ Գալստյանը։
Նրա խոսքերով՝ Մոսկվային ստորագրվելիք համաձայնագիրն այժմ նույնիսկ ձեռնտու է. «Հայաստանը ստորագրելով այդ փաստաթուղթը, սկիզբ է դնում ԵԱՏՄ-ի ու ԵՄ-ի համագործակցության մի կետի։ Մոսկվան դա դրական է համարում։ Եվ երկրորդ՝ այսօր Ռուսաստանին հարկավոր է մի դաշնակից, որը պահպանում է ԵՄ-ի հետ լավ հարաբերություններ։ Այդպիսի կենտրոն կարող է լինել Երևանը»,- ասաց Գալստյանը։
Փորձագետը նաև ընդգծում է, որ ստորագրվելիք փաստաթուղթն ավելի շատ դեկլարատիվ բնույթ ունի, արմատական փոփոխություններ չի ենթադրում. «Ռուսաստանն իր հետաքրքրությունների վտանգ չի տեսնում։ Հայաստանը դարձել է ԵԱՏՄ անդամ և քանի այնտեղ է՝ Ռուսաստանը նման փաստաթղթերից մտահոգվելու առիթ չունի։ Եթե Մոսկվան դա բացասական ընդուներ, ապա փաստաթուղթը չի ստորագրվի։ Ցանկացած փաստաթղթում կարելի է հակասություն գտնել ու ասել, որ կան հակասություններ, որոնք անհնար են դարձնում ստորագրելը։ Բայց առայժմ Մոսկվայից նման բացասական ազդակներ չենք ստանում»,- ընդգծեց Գալստյանը։
Մոտեցնո՞ւմ է արդյոք այս համաձայնագիրը Հայաստանին ԱլԳ առաջատար եռյակին հարցին ի պատասխան, Արեգ Գալստյանն արձագանքեց. «Վեկտորը մեկն է լինում, և դու պետք է հստակ հասկանաս՝ որ ուղղությամբ ես շարժվում։ Վրաստանը ամեն տեղ թափահարում է ԵՄ-ի դրոշը, ԵՄ-ում դա հասկանում ու տալիս են առավելություններ։ Բայց Հայաստանը ԵԱՏՄ անդամ լինելով, չի կարող այլ ինտեգրացիոն համակարգերից շատ մեծ բաներ սպասել»,-եզրափակեց նա։
Հարցազրույցն ամբողջությամբ՝ տեսանյութում։
