Ըստ մամուլի հրապարակումների՝ նախկին պատգամավոր Վարդան Այվազյանը Չարենցավանի հաստոցաշինական գործարանը հիմնահատակ քանդում է և վաճառում կարմիր տուֆը: «Առաջին լրատվական»-ի հետ զրույցում Չարենցավանի քաղաքապետ Հակոբ Շահգալդյանն ասաց, որ հաստոցաշինական գործարանը պատկանում է ոչ թե Վարդան Այվազյանին, այլ պաշտպանության նախարարությանը, իսկ Վարդան Այվազյանը Չարենցավանի գործիքաշինական գործարանի սեփականատերն է: Ինչ վերաբերում է գործարանը հիմնահատակ քանդելու լուրերին՝ քաղաքապետը տեղեկատվությանը չի տիրապետում։ «Նման տեղեկություն չունենք: Թեև դա իր սեփականությունն է, բայց եթե նման բան լիներ, պետք է դիմեին քաղաքապետարան, քանդելու թույլտվություն ստանային, իսկ մենք այդպիսի ինֆորմացիա չունենք: Եթե նույնիսկ այդպես լինի, իրենց վերահսկողության ներսում է, բնականաբար, ո՞վ պետք է գնա նայի, իսկ կոնկրետ քանդման հետ կապված մենք որևէ փաստաթուղթ չենք ստացել»,- հավելեց նա:
Նոյեմբերի 5-ին Չարենցավանում ՏԻՄ ընտրություններ են, միակ թեկնածուն Հակոբ Շահգալդյանն է: Հարցին՝ արդյո՞ք Վարդան Այվազյանը աջակցում է իրեն այս ընտրություններին, Հակոբ Շահգալդյանը նշեց. «Ինքն անձամբ չէ, բայց տղան հանդիպել է ինձ, ասել, որ պատրաստ է՝ ինչով պետք է, կաջակցի»:
Իսկ արդյո՞ք աջակցում է այս տարիներին մեծ հարստություն կուտակած Վարդան Այվազյանը չարենցավանցիներին, նա հետևյալ կերպ արձագանքեց. «Այդ մարդուն չընտրեցին պատգամավոր, էլ ոնց կաջակցի»: Նա նաև նշեց, որ ընտրություններից հետո հանդիպել է Վարդան Այվազյանին. «Ոչ թե վիրավորված էր, բնականանբար՝ ով էլ լիներ, իրեն վատ կզգար»,- ասաց Հակոբ Շահգալդյանը:
Իսկ արդյո՞ք նախկինում աջակցել է չարենցավանցիներին, Հակոբ Շահգալդյանը նշեց. «Վարդան Այվազյանը երկար տարիներ այստեղ քաղաքապետ է աշխատել, որոշ բանով աջակցել է, գուցե որոշ բանով էլ չի աջակցել, չեմ կարող ասել»:
Հիշեցնենք, որ խորհրդարանական ընտրություններին Վարդան Այվազյանը վստահ էր, որ ընտրվելու է: Ավելին, նա իր շտաբում հայտարարել էր. «Կոստյումս հանեմ, գցեմ Չարենցավանում, սաղ ինձ կընտրեն»: Փաստորեն սխալվեց:
