Ուկրաինայի ՆԳՆ ղեկավար Արսեն Ավակովը մեկնաբանել է իր որդու` Ալեքսանդրի, պետական միջոցների վատնման կասկածանքով ձերբակալության մասին լուրը:
«Ո՛չ որդիս, ո՛չ այն ընկերությունները, որոնց հիմնադիրն է նա, կապ չունեն և չեն ունեցել Ուկրաինայի պետական բյուջեի ոչ մի լումայի հետ: Ալեքսանդր Ավակովը կանցնի գործընթացն ու դա կապացուցի դատարանում»,- իր ֆեյսբուքյան էջում գրել է Ավակովը:
Ըստ Արսեն Ավակովի՝ Ազգային հակակոռուպցիոն բյուրոյի բոլոր գորոծողությունները քաղաքականացված են և իրականացվում են իր վրա ճնշում գործադրելու նպատակով:
«Իմ դիրքորոշումը հակակոռուպցիոն դատարանի վերաբերյալ անփոփոխ է. այն պետք է լինի արագ և ձեռնհաս: Իսկ անկախության և չներգրավվածության հավասարակշռությունը նորաստեղծ հակակոռուպցիոն մարմիններում պետք է վերականգնվի: Ես վստահ եմ՝ մենք կկարողանանք դա հավասարակշռել»,- հավելել է Ուկրաինայի ՆԳՆ ղեկավարը:
Հիշեցնենք՝ հոկտեմբերի 31-ին ձերբակալվել է Ալեքսանդր Ավակովը իր բնակարանում իրականացրած խուզարկությունից հետո: Նրան կասկածում են պետական միջոցների վատնման մեջ` 2014-2015 թթ Ուկրաինայի ՆԳՆ և ազգային գվարդիայի կարիքների համար ուղեպայուսակների գնման գործով: Այն ժամանակ գնվել էր 6 ուղեպայուսակ 16,5 միլիոն գրիվնի ընդհանուր արժեքով: Հետագայում պարզվել էր, որ այդ գնումներն իրականացվել են Ալեքսանդր Ավակովին պատկանող ընկերության միջոցով:
Ուկրաինայի ՆԳՆ-ն հայտարարել է, որ այդ գործի քննության հետևում որոշ ներքին և արտաքին ուժեր են կանգնած, որոնք ցանկանում են հին կոռուպցիոն, պայմանավորվածությունների և տանիքավորման համակարգը հետ բերել:
