«Առաջին լրատվական»-ի զրուցակիցն է «Ժառանգություն» կուսակցության փոխնախագահ Արմեն Մարտիրոսյանը։
-Պարոն Մարտիրոսյան, թե՛ պաշտոնական Երևանը և թե՛ Բրյուսելը վստահեցնում են, որ Հայաստան-Եվրամիություն նոր համաձայնագիրը նոյեմբերին ԱլԳ գագաթնաժողովի ընթացքում կստորագրվի, կա նաև համաձայնագրի տեքստը։ Սեֆիլյանի հրապարակած ցուցակի անձինք ինչ-որ վերաբերմունք արտահայտելո՞ւ են դրա վերաբերյալ։
–Մենք այդ հարցը չենք քննարկել, բայց կողմ ենք Հայաստանի ինքնիշխանությանը։ Եվ այս փաստաթուղթը բացարձակ չի խանգարում ինքնիշխանությանը։ Ինչպես տեքստից տեսաք, դա ոչ թե միակողմանի, այլ երկկողմանի պայմանավորվածություն է։
-Հայտարարել եք ապագաղութացման պայքար, տրամաբանական չէ՞, որ նախապատվությունը հենց Եվրամիությանը տաք, կարևորեք այդ համաձայնագրի ստորագրումը և դրա ջատագովը լինեք։
-Ես բոլոր ներկայացուցիչների անունից չեմ կարող ասել, բայց ինքս կողմ եմ եվրոպական ինտեգրմանը, շատերն են այդ կազմում կողմ, բայց միասնական դիրքորոշում չկա, մենք դա չենք քննարկել։ Հիմա ավելի գլոբալ հարցեր ենք քննարկում, դա հետևանք է՝ Հայաստանը ինքնիշխան մոտեցում կունենա՞, թե՞ ոչ։
-Իսկ դուք կառաջարկե՞ք այդ հարցը քննարկել։
-Ես կարծում եմ՝ մինչև այդ ուղղությունը նախանշող այլ թեմաներ կան։ Բայց խնդիր չեմ տեսնում այդ առումով։ Համենայնդեպս, չեմ լսել, որ որևէ մեկը դեմ արտահայտվի այդ նոր համաձայնագրի ստորագրմանը։
-Ե՞րբ արդեն ռեալ գործողությունների պլան կունենաք։
-Չեմ կարող ասել։ Հռչակագիրը հրապարակելուց հետո պարզ կդառնա։ Մեր տարբեր ներկայացուցիչներ ասել են, որ միայն Ժիրայր Սեֆիլյանի ցուցակով չենք բավարարվի՝ ընդլայնվելու անհրաժեշտություն կա։ Իսկ թե մնացած կազմակերպչական աշխատանքներն ինչպիսին կարող են լինել՝ կդժվարանամ հիմա ասել։
