ՀՅԴ խմբակցության ղեկավար Արմեն Ռուստամյանը լրագրողների հետ զրույցում չի բացառել, որ հնարավոր է նաև, որ դրսի միջամտություն է եղել Հոկտեմբերի 27-ին: Այդուհանդերձ, ՀՅԴ-ական պատգամավորը բացառել է, որ արտաքին միջամտությունը կատարված լինի Ռուսաստանի կողմից. «Հայաստանի թշնամին Ռուսաստանը չէ: Այդ վարկածներից գոնե ազատվեցինք, շատ ծայրահեղացված վարկածներ գոնե այսօր չեն քննարկվում, բայց ես չեմ բացառում, որ դրսի ուժերը մասնակից լինեն»:
Արմեն Ռուստամյանը զուր է սեփական դիրքորոշումը ներկայացնում որպես հանրային տեսակետ, որովհետև մեր դիտարկումներով` հասարակության շրջանում գնալով աճում են հակակայսերական տրամադրությունները, և ռուսական գործոնի հետ է կապվում ոչ միայն Հոկտեմբերի 27-ը, այլ նաև` Մարտի 1-ը, Ապրիլյան պատերազմի սանձազերծումը Ադրբեջանի կողմից:
Սակայն ուշագրավ է այն հետևողականությունը, որով Ռուստամյանը պաշտպանում է ռուսական կայսրության շահերը: Որտեղի՞ց Արմեն Ռուստամյանին նման համոզվածություն, որ Մոսկվան անմասն է Հոկտեմբերի 27-ի ոճրագործությանը: Ռուսական հատուկ ծառայությունները տեղեկատվությամբ կիսվո՞ւմ են Դաշնակցության ղեկավարության հետ, թե՞ ՀՅԴ խմբակցության ղեկավարը հանցագործություն է թաքցնում, որովհետև հստակ գիտի այն երկրի անունը, որը պատվիրել է Հոկտեմբերի 27-ը, սակայն այդ մասին չի բարձրաձայնում:
Իհարկե, շատ ավելի հավանական է այլ վարկած, որի համաձայն՝ Արմեն Ռուստամյանը, այսպես ասենք, միտումնավոր հետք է մաքրում, ընդ որում` ոչ այնքան ռուսական կայսրության, որքան` ՀՅԴ-ի սիրույն, որովհետև «պատահաբար» Հոկտեմբերի 27-ի ահաբեկչության բոլոր անմիջական կատարողները ՀՅԴ նախկին անդամներ են (ՀՅԴ անդամները զենքի վրա են երդվում և ամբողջ կյանքի համար, ըստ այդմ` դաշնակցականի նախկինը չի լինում): Հոկտեմբերի 27-ի համակողմանի ուսումնասիրությունը ցույց է տալիս, որ ՀՅԴ-ն դրա հիմնական շահառուներից մեկն է` Ռոբերտ Քոչարյանի և Ռուսաստանի հետ միասին: Հիմքեր ունենք մտածելու, որ Հոկտեմբերի 27-ի պարագայում գործ ունենք նշված սուբյեկտների կոլեկտիվ հանցագործության հետ, որտեղ ՀՅԴ-ին վերապահված են եղել ահաբեկչության կազմակերպման՝ այսպես կոչված կադրային և գաղափարական ապահովման հարցերը: Հիմա, երբ Ռուստամյանը Հոկտեմբերի 27-ի արտաքին վարկածը խորացնում է այլ ուղղությունների վրա, սլաքը միտումնավոր հեռացնում է ոչ միայն Ռուսաստանից, այլ նաև հարազատ կուսակցությունից:
Վերջերս «31»-ի գործով ցմահ դատապարտված նախկին դաշնակցական Արմենակ Մնջոյանն ակնարկել էր, որ ՀՅԴ այսօրվա ղեկավարությունը հավաքագրված է ռուսական հատուկ ծառայությունների կողմից:
Արմեն Ռուստամյանը ՀՅԴ այսօրվա հիերարխիայում երկրորդ մարդն է և տեսնելով այն հետևողականությունը, որով նա պաշտպանում է ռուսական շահերը, անգամ այն պարագայում, երբ նրան հարց է ուղղվում Ադրբեջան մատակարարող ռուսական սպառազինության վերաբերյալ, ակամայից մտածում ես, որ Մնջոյանի պնդումը գուցե համապատասխանում է իրականությանը:
