«Սասնա ծռերի» աջակիցների կազմած հռչակագիրը պատրաստ է և առաջիկա օրերին կներկայացվի հանրությանը։ Այդ մասին «Առաջին լրատվական»-ի հետ զրույցում ասաց ԳԽ պատգամավոր Ալբերտ Բաղդասարյանը։
Մեր զրուցակիցն ընդգծում է՝ հռչակագրում հակիր, բայց շատ տարողունակ նկարագրվում է այսօրվա իրավիճակի պատճառները և լուծում է ուրվագծվում. «Ինձ համար կարևորն այն է, որ հռչակագրում տեղ են գտել երկու շատ կարևոր սկզբունքային նշանակություն ունեցող դրույթներ։ Առաջինն այն է, որ Հայաստանում ոչ լեգիտիմ Սահմանադրությամբ ձևավորված վարչախմբեր են իրար հաջորդել։ Այսինքն՝ նոր Հայաստան կերտելու համար անհրաժեշտ է առանց կեղծիքների ընդունված նոր Սահմանադրություն։ Երկրորդ՝ ժամանակավոր իշխանության գաղափարը»,- ասաց Բաղդասարյանը։
Օրերս քաղաքացիական ակտիվիստ, «Ոտքի՛, Հայաստան» նախաձեռնության անդամ Դավիթ Հովհաննիսյանը մեզ հետ զրույցում կարծիք էր հայտնել, որ Սեֆիլյանի հրապարակած ցուցակում կան Սերժ Սարգսյանի կողմից ներդրված մարդիկ։ Ալբերտ Բաղդասարյանն այս հայտարարության շուրջ ասաց հետևյալը. «Եթե մենք սկսենք այդ հարցով առաջնորդվել՝ նշանակում է՝ պետության կորստի գիտակցությունից ոչինչ չենք հասկանում, նշանակում է՝ մեր խնդիրը շատ մանր է։ Ես այդ ասողին չեմ ճանաչում, բայց ինչ-որ մեկը կարող է նրա մասին էլ ասել, որ Սերժ Սարգսյանի կողմից ներդրված է»։
Բաղդասարյանի խոսքերով՝ զենքի խնդիր, այդ հարցի քննարկման խնդիր չի առաջանալու. «Եթե բոլորին հասցնենք այն վիճակին, որ բոլորը կողմ լինեն, որ պետությունը չվերանա՝ կմիանան մեզ։ Այդ դեպքում ստիպված փոքր մասը պետք է դիմի զենքի, բայց դրա կարիքը չի լինի»։
Հարցազրույցն ամբողջությամբ՝ տեսանյութում։
