Ավստրալացի գիտնականները եկել են եզրակացության, որ ոչ բոլոր սպորտաձևերն են միանման օգտակար մարդու առողջության համար, գրում է British Journal of Sports Medicine ամսագիրը։
Սիդնեյի համալսարանի մասնագետներն ուսումնասիրել են 1994-2008 թթ անցկացված 11 հետազոտությունների տվյալները։ Փորձերին մասնակցել է մոտ 80 հազար մարդ։ Կամավորների միջին տարիքը եղել է 52 տարեկանը։
Ֆիզիոլոգներն իրենց առջև նպատակ են դրել պարզելու՝ կապ կա՞ մարզաձևերի միջև, որոնցով զբաղվում են հարցվածները, և կյանքի տևողության միջև։ Արդյունքում նրանք պարզել են, որ ֆուտբոլը, վազքը, ծանր աթլետիկան և շատ այլ մարզաձևեր ոչ մի կերպ չեն ազդում կյանքի տևողության և լուրջ հիվանդությունների հանդեպ հակվածության վրա։
Պարզվել է, որ թենիս և բադմինտոն խաղալը նվազեցնում է ցանկացած հնարավոր պատճառներով վաղաժամ մահվան հավանականությունը 47 %-ով։ Առողջության համար օգտակար են նաև լողը, աերոբիկան և հեծանիվ վարելը, որոնք վաղաժամ մահվան ռիսկը կրճատում են համապատասխանաբար 28 %, 27 % և 15 %-ով։
