Ռոդ Այլենդ նահանգի Ուորիկ քաղաքի 97-ամյա բնակչուհուն ընդունել են աշխատանքի մեկուկես ամիս տևած փնտրտուքներից հետո: Մերի Պոնչինն աշխատանք է ստացել տեղի հիվանդանոցում: Այս մասին հաղորդում է Associated Press գործակալությունը:
Այժմ նրա պարտականությունների մեջ է մտնում հիվանդներին ընդունելը, ինչպես նաև ընդունարանում նրանց հարցերին պատասխանելը՝ որ մասնագետի մոտ պետք է գնա հիվանդը և որ ուղղությամբ: «Չնայած նրան, որ Մերին արդեն 97 տարեկան է, նա գերազանց է կատարում իր պարտականությունները: Մենք չունենք ոչ մի նախապաշարմունք աշխատակիցների տարիքի հետ կապված: Մենք չենք ճնշում մեր աշխատակիցներին և ոչ մի պատճառով»,- ասել է հիվանդանոցի փոխնախագահ Դևիդ Քեմբելը:
Մերի Պոնչինն առանց աշխատանքի էր մնացել 2010թ. հունվարին: Նա այդ ժամանակ աշխատում էր անշարժ գույքի գործակալությունում: Իսկ ընդհանրապես նա աշխատում է 1930թ.-ից, երբ օրը մեկ դոլարով ընդունվեց սպասուհու աշխատանքի: