Այսօր, ժամը 17-00-ին Կենտրոն և Նորք-Մարաշ վարչական շրջանների ընդհանուր իրավասության դատարանում` նախագահությամբ Արայիկ Մելքումյանի, հրապարակվեց Բելլա և Սեդրակ Քոչարյաններն ընդդեմ «Ժամանակ» օրաթերթի հիմնադիր «Սկիզբ Մեդիա Կենտրոն» ՍՊԸ-ի գործով դատական ակտը:
Հիշեցնենք, որ ՀՀ նախկին նախագահ Ռոբերտ Քոչարյանի կինն ու որդին թերթից պահանջում էին հերքել իրենց պատիվն ու արժանապատվությունը «վիրավորող» հրապարակումները` տպագրված «Ժամանակ»-ի 2010 թ. սեպտեմբերի 25-ի, 29-ի և հոկտեմբերի 7-ի համարներում, ինչպես նաև վճարել 6 մլն դրամի փոխհատուցում: Հայցվորներ Սեդրակ և Բելլա Քոչարյանները համարում են, որ «Ժամանակ» օրաթերթի հրապարակումները զրպարտություն և վիրավորանք են պարունակում, որոնցով արատավորվել է իրենց բարի անունը, պատիվն ու արժանապատվությունը, և իրենց իրավունքների վերականգնման համար պատասխանող կողմից պահանջում են 6 մլն դրամ (որից 3 մլն-ը` փաստաբանական ծառայության գումարն է, 1 մլն-ը` վիրավորանքների դիմաց ակնկալվող հատուցումը, 2 մլն-ը` զրպարտության):
Հիշեցնենք, որ արդեն ամիսներ տևած դատաքննության ընթացքում հայցվոր կողմն այդպես էլ չհստակեցրեց, թե կոնկրետ որ արտահայտությունն է համարում վիրավորանք, և որ փաստերը չեն համապատասխանում իրականությանը:
Այսօր Դատավոր Արայիկ Մելքումյանը փաստաբանական ծառայության համար պահանջվող երեք միլիոն դրամի պահանջն ամբողջությամբ մերժեց, սակայն բավարարեց 1 մլն. վիրավորանքի և 2 մլն. զրպարտության համար պահանջվող գումարի հայցը։
