Ադրբեջանական Trend գործակալության փոխանցմամբ՝ Heritage հիմնադրամի արտաքին քաղաքականության, անվտանգության և միջազգային հարաբերությունների գծով հանրահայտ փորձագետ Արիել Քոենը մեկնաբանել է Ադրբեջանի արտգործնախարար Էլմար Մամեդյարովի ամերիկյան այցերը.
«ԱՄՆ-ում Մամեդյարովը հանդիպում է ունեցել պետքարտուղար Հիլարի Քլինթոնի հետ, որն ամենաակտիվ մասնակցությունն է ցուցաբերում ղարաբաղյան հակամարտության կարգավորմանն օգնելու հարցում։ Քլինթոնը փորձում է հակամարտող կողմերին օգնել հիմնարար սկզբունքների համաձայնեցման հարցում։
Քլինթոնը հասկանում է, որ Հայաստանը կարող է կորցնել հակամարտության կարգավորման եզակի հնարավորությունը, ինչպես որ դա 2000 թվականին Քեմփ-Դևիդում տեղի ունեցավ պաղեստինյան առաջնորդ Յասիր Արաֆաթի հետ։ Այն ժամանակ Հիլարի Քլինթոնի ամուսնու՝ Բիլ Քլինթոնի նախագահության վերջին օրերն էին։ Բիլ Քլինթոնը հասավ նրան, որ Իսրայելը բավարարեց Արաֆաթի պահանջների 90 տոկոսը։
Այժմ հայկական կողմն անզիջում դիրքորոշում է գրավել և ձգտում է հասնել իր պահանջների 100 տոկոսանոց բավարարմանը, որի հետևանքով կարող է կորցնել հակամարտության կարգավորման եզակի հնարավորությունը»։
Հիշեցնենք, որ Հայաստանի, Ադրբեջանի և Ռուսաստանի արտգործնախարարները հանդիպելու են հունիսի 11-ին Մոսկվայում, իսկ նախագահները՝ հունիսի 25-ին Կազանում։
