Դիվանագիտական էթիկան միջազգային ֆենոմեն է, ուստի առանձնացնել, թե Հայաստանն ինչպիսի էթիկա պիտի ունենա, այնքան էլ ճիշտ չէ: Հոկտեմբերի 11-ին Անալիտիկ վերլուծական կենտրոնում հրավիրված քննարկմանը ՀՀ ԱԳ նախկին փոխնախարար, արտակարգ և լիազոր դեսպան Արման Նավասարդյանը ցավով նշեց, որ էթիկայի նորմերն ամրագրող որևէ փաստաթուղթ գոյություն չունի:
Նավասարդյանի կարծիքով՝ գովելի նախաձեռնություն էր դեսպանների՝ արտասահման մեկնելուց առաջ Արտաքին հարաբերությունների հանձնախմբին նախագծի վերաբերյալ ՀՀԿ-ի անցկացրած քննարկումը ներկայացնելը: Նրա կարծիքով՝ նման փաստաթուղթն անհրաժեշտ է:
«Ինչ կարելի է դրսում ասել, ինչ՝ ոչ. սա շատ մեծ հարց է և երկար քննարկման առիթ: Էթիկայի հարցը դիվանագիտական արվեստի ամենակարևոր ուղղություններից մեկն է: Եթե դուք դեսպան եք, արդեն ազատ չեք: Եթե քաղաքական գործիչ եք և ունեք ազատ արտահայտման իրավունք, դա չի նշանակում, որ պիտի ափեղ-ցփեղ խոսեք: Բոլոր ամենախելացի մարդիկ, որ դիվանագիտական առաքելությամբ են գնում, պիտի հանդես գան պետության անունից»,- ասաց նա:
Նավասարդյանի համոզմամբ՝ ամեն մեկն իրավունք չունի պետության անունից հանդես գալու, քաղաքական գործիչը կարող է ասել բաներ, որ չհամապատասխանեն և՛ այդ շրջանին, և՛ ընդհանրապես խնդիրներին, և՛ քաղաքական ուղղվածությանը: Նրանք, ովքեր հայտարարություն են անում, պետք է հասկանան՝ ինչ են ասում:
Բանախոսի փոխանցմամբ՝ դեսպանի աշխատանքը զուտ պետական ծառայություն է՝ առանց անձնական մոտեցումների և հետաքրքրությունների: Նա, ով դառնում է դեսպան, գնում է ֆորումների, դառնում պետության խոսափողը՝ ոչ մի սանտիմետր ոչ ձախ, ոչ աջ:
«Պաշտելով Շարլին՝ որպես մեծության, ողջ կյանքում սիրել եմ նրան, թարգմանել, բայց նրան դեսպան նշանակելը մեր ղեկավարության ամենամեծ սխալներից էր: Տարին մեկ անգամ նա ասում է բաներ, որ երկրի ղեկավարը երբեք չէր ասի, կամ բաներ, որոնք մենք կարող ենք ներսում ասել, մինչդեռ նրանից հարյուր տոկոսանոց լոյալություն է պետք. նա դեսպան է: Եթե ունի իր մտքերը, հրաժարական է տալիս, դառնում այնպիսի գործիչ, ով կարող է ասել այն, ինչ ուզում է: Կոնֆուցիոսն ասել է՝ թագավորին չի կարելի փնովել, հայհոյել, անպատվել, չսիրել»,- ասաց նա՝ նշելով, որ հարցն այն չէ՝ Սերժ Սարգսյանն այսպիսին է, թե այնպիսին:
Նավասարդյանը վստահ է՝ չի կարելի կանգնել և ասել նման բաներ քո երկրի ղեկավարի մասին. ոչ ոք չի կարող ասել՝ վաղը մեզ հետ ինչ կարող է լինել, երբ հրեշը, որի անունն է արմատական իսլամ, շարժվում է դեպի մեզ: Բանախոսի փոխանցմամբ՝ Սերժ Սարգսյանի ռեյտինգն ավելի բարձրացավ, ասացին՝ այս ինչ ժողովրդավարական երկիր է:
«Հաճախ մեզ մոտ արտաքին քաղաքականությունը խառնում են դիվանագիտության հետ: Վերջինս արտաքին քաղաքականության իրագործման գործիքն է, արտաքին քաղաքականությունը ներքին քաղաքականության շարունակությունն է, հետևաբար դիվանագիտությունը նաև գործիք է ներքին քաղաքականության համար, և չկա ասպարեզ, որի հետ այն չառնչվի: Հայկական դիվանագիտությունը, դժբախտաբար, ձևավորված չէ»,- ասաց նա:
Նավասարդյանի խոսքով՝ մեզ մոտ արտաքին քաղաքականությամբ զբաղվում են բոլորը՝ սկսած նախագահից, վերջացրած տաքսու վարորդով: Բանախոսն առաջնային համարեց բանակցային և հաղորդակցական դիվանագիտության հարցը: